Carcharu pedwar am ddwyn wrth yrrwr yn danfon soffas

Ar 10 Mai 2022, roedd dyn yn danfon soffas yn ardal Rhydyfelin pan ddaeth menyw at y fan yn gofyn i'r gyrrwr a oedd angen cyfarwyddiadau arno. Agorodd y fenyw'r drws ar ochr y teithiwr, dringo i mewn a cheisio cymryd y bag a oedd ynghlwm wrth y sedd.

Yna, agorodd grŵp o ddynion y drws ar ochr y gyrrwr, un â morthwyl yn ei law, un yn dal sgriwdreifer, ac un arall â chyllell sombi, gan fygwth y gyrrwr ac ymosod arno.

Gwnaethant fynnu bod y gyrrwr yn trosglwyddo arian iddynt, a mynd ag eitemau o'r fan.

Cafodd y gyrrwr ei daro sawl gwaith ar ei glun a chafodd anaf clwyfus ar ei law.

Cafodd pedwar person eu dedfrydu ddoe (dydd Mawrth 17 Ionawr) yn Llys y Goron Caerdydd am nifer o droseddau:

• Dorian Brown, 36 oed, o Donypandy, plediodd yn euog i feddu ar gyllell, dwyn ac ymosod a chafodd ei ddedfrydu i saith mlynedd ac un mis yn y carchar.
• Sarah Evans, 46 oed, o Rydyfelin, plediodd yn euog i ddwyn a chafodd ei dedfrydu i bedair blynedd a naw mis yn y carchar.
• Jason Hall, 50 oed, o Rydyfelin, plediodd yn euog i ddwyn ac ymosod a chafodd ei ddedfrydu i saith mlynedd a chwe mis yn y carchar.
• Matthew Maher, 46 oed, o Rydyfelin, plediodd yn euog i ddwyn ac ymosod a chafodd ei ddedfrydu i chwe blynedd a naw mis yn y carchar.

Dywedodd y Ditectif Gwnstabl Jack Harris:

"Roedd hwn yn ymosodiad hollol ddireswm ar yrrwr yn gwneud ei swydd.

"Diolch i'r deunydd teledu cylch cyfyng a'r ymholiadau fforensig a wnaed gan dditectifs, roeddem wedi gallu paratoi achos cryf.

"Maen nhw i gyd yn haeddu bod yn y carchar ac rwy'n falch ein bod wedi gallu sicrhau cyfiawnder i'r dioddefwr."