PCSO Prem

Dechreuodd Prem weithio i Heddlu De Cymru fel glanhawr yn ein gorsaf ym Mae Caerdydd bum mlynedd cyn gwneud cais i ddod yn PSCO.

Dywedodd Prem wrthym, “Dechreuais fy rôl glanhau yn y ddalfa yng Ngorsaf Bae Caerdydd ac yna symudais i lanhau'r swyddfeydd. Yn ystod un o fy sifftiau, roeddwn i'n siarad â'm cydweithiwr am y gwaith gwirfoddol rwy'n ei wneud gydag Ambiwlans Sant Ioan, gan fy mod wedi bod yn gwirfoddoli yno ers 16 mlynedd. Digwyddodd Rhys, Rheolwr Diogelwch y Gymuned fy nghlywed, a dywedodd wrtha i y dylwn ystyried dod yn PSCO."

“I ddechrau, doeddwn i ddim yn gwybod beth oedd PCSO;  roeddwn i wedi clywed am Gwnstabliaid yr Heddlu ond nid PCSO, ond eglurodd y rôl i mi a dywedodd fod llawer o'r gwaith maen nhw'n ei wneud yn cynnwys ymgysylltu â'r gymuned. Rwyf bob amser wedi bod yn weithgar iawn yn fy nghymuned, gan wirfoddoli gyda Sant Ioan ac addysgu ysgrythurau crefyddol i blant 5-7 oed mewn teml leol bob dydd Gwener dros yr ugain mlynedd diwethaf.”

                                                                     

Pan ofynnwyd iddi am ei phenderfyniad i newid gyrfa, soniodd Prem am ei llwybr gyrfa amrywiol a diddorol a arweiniodd at ei chais i ddod yn PCSO.

“Dilynais gwrs trin gwallt pedair blynedd yn y coleg a gweithiais fel triniwr gwallt am dipyn. Yna, cefais lawdriniaeth ar fy asgwrn cefn ac ar ôl hynny, cefais drafferth dod o hyd i waith. Yna, gwelais yr hysbyseb am y swydd glanhau a meddyliais fod unrhyw swydd yn well na dim, ac rwyf nawr yn gweithio fel PCSO yn yr un sefydliad.

“I ddechrau, roeddwn i'n meddwl y gallai fod yn ormod. Gadewais yr ysgol 30 mlynedd yn ôl felly pan ddechreuais i'r swydd gyntaf, doeddwn i ddim yn gwybod a fyddwn i'n gallu ei gwneud, ond yna fe ddes i arfer â'r drefn newydd. Rwyf wir yn ei mwynhau yn awr.

“Mae’r Tîm Gweithredu Cadarnhaol wedi bod yn gefnogol iawn ac yn llawn anogaeth bob amser. Methais y prawf ffitrwydd i ddechrau, ond pan roddais gynnig arall arni, roedd yr hyfforddwr yn garedig iawn; roedd yn fy annog ac yn fy nghymell, ac fe wnes i basio.

“Mae fy nhiwtoriaid yn wych – maen nhw bob amser yn fy nghefnogi. Weithiau rwy'n ei chael hi'n anodd ysgrifennu a sillafu – mae'r meddyliau yn fy mhen, ond rwy'n ei chael hi'n anodd eu hysgrifennu. Mae fy nhiwtoriaid wedi bod yn gefnogol iawn ac wedi egluro popeth i mi yn bersonol. Maen nhw wedi dweud wrtha i am ofyn os nad ydw i'n deall. Rwy'n teimlo fy mod wedi cael fy nghefnogi drwy gydol y broses ac rwyf wir yn mwynhau gweithio fel PCSO.”

Llongyfarchiadau i Prem a'i charfan, a fu'n dathlu dod yn Swyddogion Cymorth Cymunedol yr Heddlu yn eu seremoni cwblhau hyfforddiant yr wythnos diwethaf.

Pobl lwc gyda'ch gyrfaoedd (ac i'r rhai sy'n ymuno â'r sefydliad!) croeso i Dîm Heddlu De Cymru.