Grŵp Troseddau Cyfundrefnol yn cael cyfanswm o 58 o flynyddoedd yn y carchar am gyflenwi cyffuriau Dosbarth A

Dedfrydwyd saith aelod o Grŵp Troseddau Cyfundrefnol yn Llys y Goron Caerdydd ar 22ain Medi yn dilyn ymgyrch a arweiniwyd gan Tarian, yr Uned Troseddau Cyfundrefnol Ranbarthol ar gyfer De Cymru.

Roedd Ymgyrch Cruz yn ymchwiliad cymhleth a oedd yn mynd i'r afael â chyflenwad cyfanwerthol y grŵp o gocên ar draws rhanbarth De Cymru. Arweinydd y Grŵp Troseddau Cyfundrefnol oedd Joshua Matthews o Bontyclun, a oedd yn prynu ei gyffuriau gan nifer o gyflenwyr uwch.

Ar 21ain Gorffennaf 2023, gwelwyd Vincent Aquilina, y gwyddwn ei fod yn gyd-droseddwr gyda Matthews, yn gadael cyfeiriad yn ardal Caerau, Caerdydd yn cario bag. Aeth Aquilina i gyfarfod Matthews a rhoi'r bag iddo ac yna rhoddwyd y bag mewn Range Rover a ddefnyddiwyd gan Matthews.

Arestiwyd Joshua Matthews yn fuan wedyn ar yr A4119 yn Meisgyn, ar ôl iddo geisio dianc rhag yr heddlu, gan achosi niwed i dros 20 o gerbydau eraill ar y ffordd yn y broses. Mae ei weithrediadau wedi rhoi nifer o aelodau o'r cyhoedd mewn perygl ac wedi achosi anafiadau a thrallod i eraill.

Atafaeloedd swyddogion 4 cilogram o gocên, gyda gwerth o £400,000 ar y stryd o'r bag a roddodd Aquilina i Matthews.

Yna, cynhaliodd swyddogion chwiliad yn y cyfeiriad yn Caerau a daethpwyd o hyd i 1.5 cilogram ychwanegol o gocên, 3 cilo o blanhigyn canabis ac eitemau ychwnaegol a ddefnyddir wrth gyflenwi cyffuriau. Archwiliwyd ffôn a oedd wedi'i chysylltu â Matthews a gwelwyd bod tystiolaeth arni o ddelio mewn cyffuriau sylweddol o fewn sgyrsiau neges destun.

O ganlyniad i Ymgyrch Cruz, arestiwyd saith unigolyn a chawsant eu dedfrydu yn dilyn hynny am eu rhan yn y troseddu.

• Joshua MATTHEWS, 27 oed, o Bontyclun, Rhondda Cynon Taff: naw mlynedd am Gynllwynio i Gyflenwi cyffuriau Dosbarth A - cocên, a 12 mis am Yrru'n Beryglus.
• Vincent AQUILINA, 25 oed, o Gaerdydd: saith mlynedd a thri mis am Gynllwynio i Gyflenwi Cyffuriau Dosbarth A - cocên.
• Kaid MOHAMED, 39 oed, o Gaerdydd: un ar ddeg mlynedd a chwe mis am Gynllwynio i Gyflenwi Cyffuriau Dosbarth A - cocên.
• Jacob BATES, 29 oed, o Shifnal, Swydd Amwythig: pedair mlynedd a naw mis am Gynllwynio i Gyflenwi Cyffuriau Dosbarth A - cocên.
• Jamie HIGGINS, 22 oed, o Telford: pedair mlynedd a chwe mis am Gynllwynio i Gyflenwi cyffuriau Dosbarth A - cocên.
• Alan WILLS, 57 oed, o Gaerdydd: pedair mlynedd a chwe mis am Gynllwynio i Gyflenwi cyffuriau Dosbarth A - cocên, a Meddu ar Gyffuriau Gyda'r Bwriad o'u Cyflenwi - canabis.
• Jacob HOWELL-SANTOS, 31 oed, o Gaerdydd: pedair mlynedd a thri mis am Gynllwynio i Gyflenwi cyffuriau Dosbarth A - cocên, a Chaniatáu Cyflenwi Cyffuriau a Reolir ar Safle - cocên.

Dywedodd y Ditectif Brif Arolygydd Lloyd Williams o Uned Troseddau Cyfundrefnol Ranbarthol Tarian: "Roedd y dynion hyn yn benderfynol o adael i symiau mawr o gyffuriau Dosbarth A i dreiddio drwy gymunedau De Cymru. Diolch i ymdrechion diflino tîm ymroddedig o ymchwilwyr, cawsant eu dal ac yn dilyn hyn maent wedi derbyn dedfrydau sylweddol.

"Ein gobaith yw bod y dedfrydau hyn yn atal unrhyw un arall sy'n cymryd rhan, neu sy'n meddwl cymryd rhan, mewn delio cyffuriau."

Mae ymchwiliad pellach o dam y Ddeddf Enillion Troseddau yn mynd rhagddo.