Gwerthwr cyffuriau a oedd yn cyflenwi plant yn cael ei garcharu am bum mlynedd

Ym mis Mai 2023, cafodd yr Heddlu wybod am blentyn yn Ysbyty Tywysoges Cymru, Pen-y-bont ar Ogwr a oedd wedi dioddef gorddos posibl o gyffuriau.

Ar ôl gwneud ymholiadau, llwyddodd swyddogion i leoli'r cyflenwr a chyflwyno warant brys i archwilio cyfeiriad cartref David Rodgers, 51 oed yn Mill Street, Maesteg.

Atafaelwyd gwerth dros £8,000 o gocên a gwerth dros £2,200 o Ganabis o'r cyfeiriad. Atafaelwyd cyfarpar cyffuriau eraill hefyd gan gynnwys clorian a bagiau cyflenwi cyffuriau.

Dywedodd y Ditectif Ringyll Lia Jones, "Mae hyn yn tynnu sylw at y peryglon amlwg a'r effaith a gaiff cyflenwi cyffuriau ar ein cymunedau. Dyma pam ein bod yn gweithredu ar unrhyw wybodaeth a gawn gan y gymuned oherwydd y risgiau y mae'r math hwn o drosedd yn eu hachosi.

Os byddwch yn gweld unrhyw beth yr hoffech roi gwybod amdano, gallwch wneud hynny'n ddienw ar Crimestoppers ar 0800 555111.”

Mae David Rodgers bellach wedi'i garcharu am 60 mis am feddu ar gocên, canabis a diazepam gyda'r bwriad o'u cyflenwi.