Wythnos Dwysáu Gwaith ar Linellau Cyffuriau

Cafodd 31 o bobl eu harestio ac atafaelwyd gwerth amcangyfrifedig o £27,400 yn ystod yr wythnos dwysáu gwaith ar linellau cyffuriau ddiweddaraf.

Mae swyddogion o ardal Heddlu De Cymru wedi arestio 31 o bobl, a diogelu 58 o bobl a oedd yn agored i niwed yn ystod wythnos o weithredu i dargedu ac amharu ar linellau cyffuriau.

Llinellau cyffuriau yw'r enw a roddir i ddisgrifio'r weithred ble bydd grwpiau troseddau cyfundrefnol (OCGs) yn symud a chyflenwi cyffuriau, yn aml o ddinasoedd i mewn i drefi bach ac ardaloedd gwledig.

Mae'r gweithgarwch hwn wedi cyd-daro â'r "wythnos ddwysáu" genedlaethol sy'n cael ei arwain gan yr Asiantaeth Troseddu Genedlaethol. Cynhaliwyd yr wythnos o weithgarwch ddiweddaraf o ddydd Llun 9 Hydref hyd at ddydd Llun 16 Hydref.

Uchafbwyntiau ar draws ardal yr heddlu:

• 31 o bobl wedi eu harestio am amrywiaeth o droseddau;
• Chwalu chwe llinell cyffuriau;
• Gweithredu 9 gwarant chwilio;
• Atafaelu £56,610 mewn arian parod;
• Atafaelu 184g o grac cocên (gwerth stryd amcangyfrifedig o hyd at £9,750)
• Atafaelu 235g o gocên (gwerth stryd amcangyfrifedig o hyd at £12,800)
• Atafaelu 103g o heroin (gwerth stryd amcangyfrifedig o hyd at £4,900)
• Atafaelu amrywiaeth o arfau, gan gynnwys cyllyll, morthwylion, hylif taniwr, a dryll tawel;
• Diogelu a nodi 34 o blant ac oedolion agored i niwed;
• Atafaelu wyth ffôn symudol;
• Atafaelu pedwar car;

Ymgysylltodd swyddogion hefyd â phlant, rhieni a gweithwyr proffesiynol i dynnu sylw at beryglon ymgymryd â gweithgarwch Llinellau Cyffuriau, a chynhaliwyd sesiynau ymwybyddiaeth o Linellau Cyffuriau i bartneriaid amlasiantaeth ac 11,000 o blant.

Dywedodd y Ditectif Arolygydd Chris Williams, a gyd-gysylltodd yr wythnos o weithgarwch yn Ne Cymru: "Er ein bod yn gweithio drwy gydol y flwyddyn i waredu'r cyffuriau oddi ar y strydoedd, mae'r wythnos hon wedi arwain at ganlyniadau sylweddol.

"Drwy amharu ar linellau cyflenwi a chael gwared ar y rheini sy'n rhan ohono, gallwn wneud cymunedau De Cymru yn fwy diogel.

"Gallwn ond gwneud hyn gyda'r gefnogaeth a'r wybodaeth a gawn gan y cyhoedd, felly rwy'n annog unrhyw un sydd â gwybodaeth am ddelio cyffuriau yn eu cymuned i'n ffonio ar 101. Bydd pob darn o wybodaeth yn bwysig.