Ymgyrch Homestead Cymru: menter Cymru gyfan wedi'i llunio er mwyn helpu ffermwyr i leihau'r siawns y byddant yn dod yn ddioddefwyr troseddau

Gan fod tymor sioeau amaethyddol yr haf wedi cyrraedd, rydym yn atgoffa ffermwyr a pherchnogion tir o'r mesurau diogelwch pwysig y dylent eu rhoi ar waith i gadw eu heiddo yn ddiogel.

Mae Ymgyrch Homestead Cymru yn fenter Cymru gyfan wedi'i llunio er mwyn helpu ffermwyr i leihau'r siawns y byddant yn dod yn ddioddefwyr troseddau, yn enwedig pan fyddant i ffwrdd dros gyfnod y sioeau.

Dyma rai o'r mesurau syml y gellir eu rhoi ar waith:

• Edrychwch ar bob un o'ch mesurau diogelwch a gwiriwch eu bod ar waith ac yn gweithio.
• Sicrhewch fod yr adeiladau wedi'u cloi a bod y peiriannau ynddynt hefyd wedi'u cloi ac yn ddiogel.
• Sicrhewch y gall unrhyw un sy'n ymweld â'ch fferm weld unrhyw arwyddion yn glir, p'un a yw'n rhybudd ynghylch system teledu cylch cyfyng neu fesurau diogelwch eraill, fel system dŵr CLYFAR neu system tracio cerbydau
• Sicrhewch fod y system teledu cylch cyfyng yn gweithredu'n llawn ac y bydd yn recordio unrhyw symudiadau ar eich fferm. Sicrhewch fod lensiau'r system teledu cylch cyfyng yn lân a'u bod yn goruchwylio'r ardal gywir. Gall camerâu symud mewn gwyntoedd cryfion neu wrth gael eu taro gan beiriannau fferm.
• Rhowch wybod i'ch cymdogion eich bod i ffwrdd a phryd y byddwch yn dychwelyd adref ac efallai y dylech greu grŵp WhatsApp gyda'ch cymuned leol er mwyn rhoi'r wybodaeth ddiweddaraf i'ch gilydd am unrhyw gerbydau amheus ac i anfon lluniau, pan fydd yn ddiogel gwneud hynny.
• Dylech gloi gatiau sy'n arwain at eich fferm, ar eich dreif neu drwy gaeau. Gosodwch un o golfachau eich gatiau am yn ôl, os yn bosibl, fel na ellir eu tynnu o'u lle.
• Os yw'n bosibl, gofynnwch i rywun aros ar eich fferm, fel bod rhywun yn bresennol yno.
• Defnyddiwch olau ar amserydd o amgylch y fferm, p'un a yw'n goleuo yn dilyn symudiad neu yn ystod cyfnod penodol o amser.

Ystyriwch ddefnyddio camerâu trywydd sy'n dechrau recordio pan fydd symudiad ac sy'n rhad i'w prynu a'u gosod.

Dywedodd y Rhingyll Louise Tew, sy'n swyddog troseddau bywyd gwyllt:

“Rydym yn ymwybodol o'r cynnydd cyflym blaenorol mewn achosion o droseddau cefn gwlad yn ystod tymor y sioeau, ond mae'r rhain wedi gostwng yn ystod y blynyddoedd diwethaf yn sgil Ymgyrch Homestead Cymru.

“Mae pob un ohonom yn ymwybodol bod angen i ni fod yn arbennig o wyliadwrus, a bydd ein patrolau yn ein hardaloedd gwledig yn parhau. Gofynnwn i ffermwyr chwarae eu rhan a dilyn y canllaw syml hwn er mwyn helpu i atal troseddau yn ystod tymor sioeau amaethyddol Cymru.”