Dau ddeliwr cyffuriau a oedd yn sefydlu labordy cemegol anghyfreithlon yn cael eu carcharu

Mae dau ddeliwr cyffuriau, a oedd wrthi'n sefydlu labordy cemegol i gynhyrchu symiau diwydiannol o amffetamin wedi cael eu dedfrydu yn Llys y Goron Caerdydd.

Ar 27 Gorffennaf yn Llys y Goron Caerdydd, dedfrydwyd David Tyrell, 53 oed, i 29 mis yn y carchar a David Allsopp, 62 oed, i bedair blynedd yn y carchar am feddu ar Amffetamin dosbarth B gyda'r bwriad o'i gyflenwi.

Ar 6 Medi 2022, cafodd Tyrell ac Allsopp eu stopio yn Butetown, Caerdydd a daethpwyd o hyd i flwch offer DeWalt yn eu cerbyd, a oedd yn cynnwys 28KG o Amffetamin dosbarth B. Hefyd, daethpwyd o hyd i amrywiaeth o bapurau â chyfarwyddiadau cam wrth gam ar gyfer paratoi a chynhyrchu Amffetamin ynghyd â derbynebau ar gyfer peiriant cywasgu hydrolig a brynwyd.

Cafodd eiddo yn Swydd Derby yr oedd David Allsopp yn gysylltiedig ag ef hefyd ei chwilio a daethpwyd o hyd i 22KG ychwanegol o amffetamin, ynghyd â symiau llai o getamin ac MDMA Dosbarth A.

Cafodd storfa arall yr oedd Allsopp yn gysylltiedig â hi hefyd ei nodi yn Blackpool, a chafodd gwarant ei gweithredu yn y lleoliad. Roedd y storfa yn cynnwys 100 litr o asid, cafn goginio maint diwydiannol a chyfarpar ar gyfer cynhyrchu symiau diwydiannol o amffetamin.

Cafodd Tyrell ac Allsopp eu cyhuddo a'u cadw yn y ddalfa.

Cafodd cyfanswm o 50KG o amffetamin ei atafaelu gan David Tyrell a David Allsopp, a chafodd eu labordy cemegol ar gyfer cynhyrchu symiau diwydiannol o amffetamin ei thynnu'n ddarnau. Amcangyfrifwyd cyfanswm gwerth stryd rhwng £250,000 a £500,000 ar gyfer y cyffuriau a atafaelwyd.

Dywedodd y Ditectif Prif Arolygydd Russ Jenkins o Uned Cuddwybodaeth a Throseddau Cyfundrefnol yr Heddlu "Roedd yr ymchwiliad hwn yn un hir ac yn hynod gymhleth, ac o ganlyniad llwyddwyd i erlyn y diffynyddion. Roedd Tyrell o Fanceinion ac Allsopp o Swydd Derby yn credu y gallent ddefnyddio strydoedd De Cymru i ddosbarthu symiau sylweddol o gyffuriau a fyddai wedi cael effaith andwyol ar unigolion a chymunedau lleol ac a fyddai, fwy na thebyg, wedi arwain at droseddau meddiangar ac achosion o drais.

Rydym yn parhau'n ymrwymedig i fynd i'r afael â'r troseddwyr cyfundrefnol mwyaf difrifol ac rydym yn parhau i annog aelodau o'r cyhoedd i gysylltu â ni os bydd ganddynt unrhyw wybodaeth. Efallai mai dyna fydd y darn allweddol o'r jig-so a fydd yn ein helpu i erlyn y troseddwyr difrifol a chyfundrefnol hyn.”