Dyn o Lerpwl wedi'i anfon i'r carchar yn dilyn atafaelu gwerth miliwn o bunnoedd o gyffuriau

Mae dyn o Lannau Mersi wedi cael ei anfon i'r carchar am saith mlynedd, ar ôl iddo gael ei stopio gan heddlu Gorllewin Mersia ar 12 Mehefin 2023 fel rhan o ymgyrch ar y cyd gan Tarian, yr Uned Troseddau Cyfundrefnol ar gyfer De Cymru, ac Uned Troseddau Cyfundrefnol Rhanbarthol y Gogledd-orllewin (NWROCU).

Roedd Ronald Grimes, 46 oed o Sefton yn Lerpwl, yn cario 105kg o Amffetamin â gwerth stryd o dros filiwn o bunnoedd yng nghefn ei gar.

Dywedodd y Ditectif Gwnstabl Adam Griffiths o Dîm Amharu Rhanbarthol Tarian: “Cafodd Grimes ei stopio wrth deithio o Lerpwl i Dde Cymru.  Roedd 105 cilogram o amffetamin â gwerth stryd o dros filiwn o bunnoedd yn ei gar, a allai fod wedi achosi lefel aruthrol o niwed ar ein strydoedd ac wedi galluogi'r rhai a oedd yn gysylltiedig â'r achos i elwa ar ddioddefaint a dibyniaethau eraill.

“Nid yn unig roedd Grimes yn masnachu lefelau diwydiannol o amffetamin i Gymru, ond dangosodd lawrlwythiadau ffôn symudol ei fod hefyd yn ymwneud â chyflenwi canabis cyfanwerthol yn ardal Lerpwl.

“Dyma enghraifft ardderchog o Tarian yn gweithio mewn partneriaeth lwyddiannus â'n cydweithwyr yn Uned Troseddau Cyfundrefnol Rhanbarthol y Gogledd-orllewin a Heddlu Gorllewin Mersia.

“Dylai'r ddedfryd a roddwyd i Grimes gyfleu neges glir y byddwn yn gweithio'n ddi-baid i ddod o hyd i'r rhai sy'n ceisio llenwi ein strydoedd â chyffuriau anghyfreithlon a'u dwyn gerbron y Llysoedd.”

Ddydd Llun 21 Awst, cafodd Grimes ddedfryd o saith mlynedd yn y carchar, wedi'i leihau o ddedfryd deng mlynedd ar ôl iddo bledio'n euog.