Dau ddyn wedi'u carcharu am fod yn rhan o grŵp troseddau cyfundrefnol a oedd yn gysylltiedig â llofruddiaeth yng Nghaerdydd

Clywodd y llys fod y grŵp troseddau cyfundrefnol yn ymwneud â chynhyrchu a chyflenwi canabis o dŷ yn 319 Heol Casnewydd yn y Rhath, Caerdydd.

 

Dau ddyn wedi'u carcharu am fod yn rhan o grŵp troseddau cyfundrefnol a oedd yn gysylltiedig â llofruddiaeth yng Nghaerdydd.

Mae dau ddyn wedi cael eu carcharu am fod yn rhan o grŵp troseddau cyfundrefnol a oedd yn gysylltiedig â llofruddiaeth Tomasz Waga.

Cafwyd Arjet Mehalla, 43 oed o’r Tyllgoed, yn euog o gymryd rhan yng ngweithgareddau grŵp troseddau cyfundrefnol yn dilyn treial yn Llys y Goron Casnewydd.

Cafwyd ei nai, Ardit Mehalla, 26 oed, o Lundain yn euog o ymwneud â thyfu canabis.

Clywodd y llys fod y grŵp troseddau cyfundrefnol yn ymwneud â chynhyrchu a chyflenwi canabis o dŷ yn 319 Heol Casnewydd yn y Rhath, Caerdydd.

Y ffatri canabis hon yr oedd Tomasz Waga a dyn arall wedi teithio i Gaerdydd o Lundain er mwyn torri i mewn iddi ym mis Ionawr 2021.

Cafodd grŵp troseddau cyfundrefnol a oedd yn gyfrifol am y ffatri ei rybuddio am hyn, ac ymosodwyd ar y ddau ddyn yn y lleoliad.

Aed â Tomasz o'r eiddo mewn Mercedes arian, sydd heb ei ddarganfod o hyd, a chanfuwyd ei gorff yn Westville Road, Pen-y-lan, gan aelod o'r cyhoedd tua 11.30pm y diwrnod hwnnw. Roedd wedi dioddef sawl anaf.

 

Mae'r rhai a oedd yn gyfrifol am ei lofruddiaeth eisoes wedi cael eu dedfrydu.

Mae Josif Nushi a Mihal Dhana yn bwrw dedfrydau oes am lofruddiaeth. Cafodd Hysland Aliaj ei garcharu am 10 mlynedd am ddynladdiad.

Yr ymchwiliad hwn oedd un o'r ymchwiliadau mwyaf cymhleth ac estynedig a gynhaliwyd erioed gan Heddlu De Cymru gydag ymholiadau'n cael eu cynnal ledled y DU ac Ewrop, gan gynnwys arestiadau yn Albania, Ffrainc a'r Almaen.

Dywedodd y Ditectif Uwch-arolygydd Mark O'Shea o Heddlu De Cymru: “Wrth ymchwilio i lofruddiaeth Tomasz Waga, roeddem hefyd yn ymchwilio i’r grŵp troseddau cyfundrefnol ehangach. Mae hyn yn rhan o genhadaeth Heddlu De Cymru i erlid troseddwyr yn ddiflino.

“Mae’r canlyniad yn y llys yn deillio o waith ditectif a oedd yn cynnwys teleffoni fforensig manwl ynghyd â data system adnabod rhifau ceir yn awtomatig a theledu cylch cyfyng.

“O ganlyniad i’r ymchwiliadau helaeth hyn, bu modd i ni brofi’r cysylltiad rhwng Arjet Mehalla ac Ardit Mehalla, a’r rhai a gafwyd yn euog o lofruddiaeth Tomasz.

“Yn aml, mae pobl yn sôn am ganabis fel trosedd heb ddioddefwyr, ond nid yw hynny'n wir. Mae troseddau cyfundrefnol y tu ôl i lawer o'r ffatrïoedd canabis hyn. Mae'r troseddwyr yn ennill llawer o arian ar draul ein cymunedau ac maen nhw'n gwarchod eu planhigfeydd gan ddefnyddio trais a bygythiadau.”

Cafodd £48k mewn arian parod a nifer o gerbydau eu hatafaelu yn ystod yr ymchwiliad.

Cafodd Arjet Mehalla ei ddedfrydu i dair blynedd yn y carchar.

Cafodd Ardit Mehalla ei ddedfrydu i bum mlynedd yn y carchar.

Mae disgwyl i drydydd dyn, Isaac Izar, gael ei ddedfrydu am drosedd debyg ar 11 Awst ar ôl iddo hefyd bledio’n euog.

Mae teulu Tomasz Waga wedi cael y wybodaeth ddiweddaraf.

 

Er mwyn cael rhagor o wybodaeth am sut i adnabod arwyddion ffatri canabis, ewch i:https://crimestoppers-uk.org/keeping-safe/community-family/cannabis-cultivation

 

Gallwch roi gwybod am bryderon drwy un o'r ffyrdd canlynol:

 

🗪 Sgwrs Fyw https://www.south-wales.police.uk/cy-GB/

💻 Rhoi gwybod ar-lein https://www.south-wales.police.uk/cy-GB/riportio/riportio

📧 E-bost [email protected]

📞 101