Dynion a gamfanteisiodd ar bobl ifanc yn eu harddegau a garcharwyd am droseddau cyffuriau a chaethwasiaeth fodern

Mae chwe dyn wedi cael eu carcharu am gyfanswm o 34 mlynedd a thri mis am droseddau'n ymwneud â chyffuriau a chaethwasiaeth fodern.

Ymgyrch Bridport oedd yr ymchwiliad ynghylch grŵp troseddau cyfundrefnol o Gasnewydd a oedd yn ecsbloetio pobl ifanc yn eu harddegau yng Nghastell-nedd i werthu eu cyffuriau ar eu rhan.

Mae'r bobl ganlynol wedi cael eu dedfrydu am gynllwynio i gyflenwi cyffuriau dosbarth A ac am ecsbloetio pobl ifanc yn eu harddegau sy'n agored i niwed, o dan adran dau o'r Ddeddf Caethwasiaeth Fodern.

• Dwayde Stock, 28 oed, o Gasnewydd – naw mlynedd am droseddau'n ymwneud â chyffuriau a chaethwasiaeth fodern.
• David Rustham Allen, 30 oed o Gasnewydd – wyth mlynedd a thri mis am droseddau'n ymwneud â chyffuriau a chaethwasiaeth fodern.
• Justin James Hensall, 36 oed, o Gasnewydd – chwe blynedd ac wyth mis am droseddau'n ymwneud â chyflenwi cyffuriau a chaethwasiaeth fodern.
• Joshua Nathan Jeffries, 32 oed, o Gasnewydd – tair blynedd ac wyth mis am gyflenwi cyffuriau.
• Ottis Jeffries, 28 oed, o Gasnewydd – tair blynedd a phedwar mis am gyflenwi cyffuriau.
• Bernard Christopher Hurley, 37 oed, o Gasnewydd – tair blynedd a phedwar mis am gyflenwi cyffuriau.

Dywedodd y Ditectif Brif Arolygydd, Phil Oseng-Rees: “Rydym yn ymrwymedig i fynd i'r afael â Llinellau Cyffuriau er mwyn cadw ein cymunedau'n ddiogel ac i garcharu'r rhai sy'n cymryd mantais o eraill at ddibenion delio mewn cyffuriau.

“Mae ecsbloetio plant sy'n agored i niwed fel hyn yn annerbyniol ac mae'r defnydd o ddeddfwriaeth caethwasiaeth fodern yn elfen bwysig wrth dargedu rhwydweithiau troseddol sy'n defnyddio plant ac oedolion sy'n agored i niwed i wneud yr elw mwyaf o gyflenwi cyffuriau. Mae dedfryd heddiw yn cyfleu neges glir y byddwn yn parhau i geisio dileu gweithgarwch llinellau cyffuriau.”

Dyma'r achos cyntaf o'i fath yn Heddlu De Cymru lle mae llinellau cyffuriau wedi cael eu herlyn am droseddau'n ymwneud â chaethwasiaeth fodern yn ogystal â chyhuddiad o fasnachu mewn cyffuriau drwy ddefnyddio ymchwiliad sy'n cael ei arwain gan dystiolaeth heb fod angen unrhyw dystiolaeth gan y dioddefwyr i gefnogi'r erlyniad.

Ychwanegodd y Ditectif Arolygydd Marc Gardner: “Hoffwn ddiolch i bawb am eu gwaith caled a'u hymrwymiad i barhau â'r ymchwiliad hwn. Heb gefnogaeth y Tîm Troseddau Cyfundrefnol yng Nghastell-nedd, Tarian, Gwasanaeth Carchardai a Phrawf Ei Fawrhydi byddai'r ymchwiliad hwn wedi bod yn llawer anoddach.

“Nid oes lle i ecsbloetiaeth na chaethwasiaeth yn ein cymunedau yn Ne Cymru, a byddwn yn gwneud popeth o fewn ein gallu i arestio'r rhai dan sylw.

“Os ydych yn poeni am bobl yn delio mewn cyffuriau yn yr ardal lle rydych chi'n byw, rhowch wybod i ni. Caiff yr holl wybodaeth ei chofnodi, a byddwn bob amser yn ceisio gweithredu arni.”