Teyrnged gan deulu yn dilyn gwrthdrawiad ym Mhenrhiwceibr

Mae'r fenyw a fu farw yn dilyn gwrthdrawiad traffig ffyrdd ym Mhenrhiwceibr, Aberpennar, wedi'i henwi fel Wendy Setterfield, a oedd yn 76 oed.

Digwyddodd y gwrthdrawiad, a oedd yn cynnwys Ford Focus glas, tua 8.05pm nos Iau (24 Tachwedd) ar Heol yr Eglwys.

Mae teulu Wendy wedi cyhoeddi'r datganiad canlynol:

“Gyda chalon drom rydym yn cyhoeddi marwolaeth drasig ein mam a'n mam-gu annwyl, Wendy Setterfield, a fu farw nos Iau.

“Roedd Wendy yn fenyw gynnes, garismatig a chymdeithasol. Bydd cynifer o'r gymdeithas yn gweld ei heisiau yn fawr. Mae'n gadael ei mab, ei merch yng nghyfraith a'i hwyres, a hoffem ddiolch i bawb am eu cefnogaeth a'u geiriau caredig yn ystod y cyfnod hwn.

“Hoffem ddiolch i bawb a'i helpodd ar safle'r gwrthdrawiad ddydd Iau. Mae cymuned Penrhiwceibr wedi dangos cymaint o gariad tuag ati ac mae clywed ei ffrindiau'n siarad amdani mor gynnes wedi bod yn gysur mawr.

“Byddwn yn sicrhau y caiff manylion ei hangladd eu rhannu â phawb a oedd yn ei charu.”

Mae dyn lleol 24 oed, a gafodd ei arestio ar amheuaeth o achosi marwolaeth drwy yrru'n beryglus, wedi cael ei ryddhau ar fechnïaeth nes y caiff ymholiadau pellach eu gwneud.

Dywedodd Rhingyll yr Heddlu, Darren Westall: "Rydym yn meddwl am deulu a ffrindiau Wendy.

“Mae'r ymchwiliad yn parhau, ac rydym am glywed gan unrhyw un a welodd y gwrthdrawiad neu'r ffordd yr oedd y car yn cael ei yrru cyn y gwrthdrawiad, neu unrhyw un a stopiodd i helpu.

"Rydym hefyd yn apelio am ddeunydd fideo camera dashfwrdd, ffôn symudol neu CCTV a allai gynorthwyo'r ymchwiliad."

Gall unrhyw un sydd â gwybodaeth gysylltu â ni drwy un o'r ffyrdd canlynol gan ddyfynnu'r cyfeirnod *397365.

• Ewch i: https://www.south-wales.police.uk/cy-GB/cysylltu-a-ni/af/cysylltu-a-ni/us/cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/
• Drwy e-bost: [email protected]
• Ffôn: 101