Dedfrydu dyn i 25 o flynyddoedd o garchar am drosedd cam-drin rhywiol ‘erchyll’

Cafodd hyfforddwr nofio, a gamddefnyddiodd ei rôl i gam-drin pum merch ifanc yn rhywiol, ei ddedfrydu i 25 o flynyddoedd yn y carchar yn Llys y Goron Caerdydd ddydd Gwener, 11 Tachwedd.

Cafwyd Robert Rixon, 75 oed, o Borthcawl, yn euog o 28 o gyhuddiadau o ymosodiad rhywiol, gan gynnwys un cyhuddiad o drais.

Pan gyflawnwyd y troseddau cyntaf, a ddigwyddodd yn Ysgol Gyfun Porthcawl rhwng 2000 a 2005, roedd Rixon yn hyfforddwr nofio. Cyflawnwyd y troseddau yn erbyn tair merch pan oeddent rhwng 11 a 13 oed.

Yn ddiweddarach, gwnaeth Rixon logi pwll nofio yn Ysgol Heronsbridge ym Mhen-y-bont ar Ogwr lle bu'n cynnal clwb achub bywyd rhwng 2013 a 2015. Nodwyd bod Rixon wedi ymosod yn rhywiol ar ddwy ferch arall, a oedd hefyd rhwng 11 a 13 oed, yn y clwb tua 2015.

Lansiwyd ymchwiliad yn 2018 ar ôl i un o'r menywod roi gwybod i'r heddlu ei bod wedi cael ei cham-drin gan Rixon pan oedd yn blentyn. Yn dilyn hyn, nododd yr heddlu bedwar dioddefwr arall a arweiniodd at gynnal ymchwiliad cymhleth a manwl gyda nifer sylweddol o honiadau o gam-drin rhywiol difrifol, gan gynnwys trais.

Dywedodd swyddog yn yr achos, y Ditectif Gwnstabl Tony Daniel:

“Hoffwn dalu teyrnged arbennig i'r dioddefwyr a ddangosodd ddewrder anhygoel drwy gydol yr ymchwiliad heddlu hwn.

“Gobeithio y bydd gwybod bod Rixon yn y carchar yn galluogi'r pum menyw hyn i symud ymlaen gyda'u bywydau gan wybod ei fod wedi'i ddwyn o flaen ei well o'r diwedd am ei droseddau erchyll ac anesgusodol.

“Mae cymorth ar gael i bob dioddefwr trais rhywiol, a byddem yn annog pob dioddefwr, ni waeth pryd y digwyddodd y drosedd, i roi gwybod amdani.”

Gellir rhoi gwybod am ymosodiadau rhyw neu achosion o gamdriniaeth drwy 101, neu drwy gysylltu â Crimestoppers yn ddienw ar 0800 555 111.

I gael gwybodaeth, canllawiau a sicrwydd, ewch i: https://www.south-wales.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/

Mae Canolfan Atgyfeirio Ymosodiadau Rhywiol (SARC) yn fan lle gallwch fynd ar ôl treisio neu ymosodiad rhywiol i gael cymorth meddygol, ymarferol ac emosiynol cyfrinachol gan feddygon, nyrsys a gweithwyr cymorth arbenigol.