Mae cwpl o'r Barri wedi'i garcharu am gam-drin plentyn yn rhywiol

Mae David Crapper, 38, wedi cael ei ddedfrydu i 17 o flynyddoedd o garchar, gyda phedair blynedd estynedig dan drwydded.
Dedfrydwyd ei wraig, Kim Crapper, 39, i chwe blynedd o garchar, gyda thrwydded estynedig o dair blynedd.
Daeth y troseddau i'r amlwg wedi i'r dioddefwr, na ellir ei henwi am resymau cyfreithiol, ddweud wrth ffrind am eu hymddygiad a chafodd y ddau eu harestio.
Plediodd y diffynyddion yn euog i gyhuddiadau o ymosod yn rhywiol ar blentyn o dan 13 oed, ymosod yn rhywiol, gwneud i blentyn gymryd rhan mewn gweithgarwch rhywiol neu ei ysgogi i wneud hynny, a chymryd rhan mewn gweithgarwch rhywiol ym mhresenoldeb plentyn. Plediodd David Crapper yn euog hefyd i gyhuddiad o dreisio a gwneud i blentyn wylio gweithred rywiol.
Cawsant eu dedfrydu yn Llys y Goron Caerdydd ddydd Gwener (18 Tachwedd).
Clywodd y llys i'r gamdriniaeth ddechrau pan oedd y ferch yn ifanc iawn gan barhau am sawl blwyddyn.

Dywedodd y Ditectif Arolygydd Christine Edmunds o Heddlu De Cymru: “Yn gyntaf, hoffwn gydnabod dewrder y dioddefwr i gysylltu â'r heddlu.
“Rydym yn cymryd pob ymosodiad rhywiol y rhoddir gwybod i ni amdano o ddifrif ac yn annog dioddefwyr i gysylltu â'r heddlu, ni waeth pryd y digwyddodd, gan deimlo'n hyderus y byddant yn cael eu trin â pharch ac urddas ac yr ymchwilir yn llawn i'w honiad.
“Dywedodd y barnwr ei bod yn anodd meddwl am drosedd fwy erchyll ac nad yw'r diffynyddion wedi dangos unrhyw edifeirwch gwirioneddol.
“Roeddem yn benderfynol o gael cyfiawnder i'r dioddefwr ac, felly, gwnaethom weithio'n agos gyda Gwasanaeth Erlyn y Goron er mwyn cyrraedd y nod hwnnw.
“Mae cymorth a chefnogaeth ar gael i bob dioddefwr trais rhywiol, a byddem yn annog pob dioddefwr i gysylltu â'r heddlu.”

Gellir rhoi gwybod am ymosodiadau rhywiol neu achosion o gamdriniaeth i'r heddlu, neu drwy gysylltu â Crimestoppers yn ddienw ar 0800 555 111.

🗪Sgwrs Fyw (9pm-4pm) Tudalen gartref | Heddlu De Cymru (south-wales.police.uk)

💻Rhowch Wybod Ar-lein Riportio | Heddlu De Cymru (south-wales.police.uk)

📧 E-bostiwch [email protected]

📞 101

Ffoniwch 999 bob amser mewn argyfwng.