Mae ffigurau'n dangos bod dioddefwyr sgamiau siopa ar-lein dros y Nadolig wedi colli £1,000 yr un

Mae ffigurau'n awgrymu bod pobl a fu'n siopa ar-lein dros gyfnod y Nadolig wedi colli mwy na £15m i dwyllwyr y llynedd.

Dangosodd achosion a gafodd eu hadrodd i Action Fraud a'u dadansoddi gan y Ganolfan Cudd-wybodaeth Twyll Genedlaethol fod siopwyr ledled Cymru, Lloegr a Gogledd Iwerddon wedi colli £15.3m rhwng mis Tachwedd 2021 a mis Ionawr 2022 oherwydd sgamiau. Mae ffigurau'n dangos bod, ar gyfartaledd, dioddefwyr sgamiau siopa ar-lein dros y Nadolig wedi colli £1,000 yr un.

Gwnaethant hefyd ddangos mai'r rheini rhwng 19 a 25 oed oedd fwyaf tebygol o gael eu twyllo.

Roedd y sgamiau yn cynnwys:

- siopwr a gollodd fwy na £150 wrth geisio prynu ffôn symudol ar y cyfryngau cymdeithasol

- siopwr arall a gafodd ei dwyllo i dalu mwy na £7,000 wrth geisio prynu cerbyd gwersylla ar-lein

- collodd trydydd dioddefwr bron i £500 wrth geisio prynu esgidiau ar lwyfan cyfryngau cymdeithasol

Mae Action Fraud a'r Ganolfan Seiberddiogelwch Genedlaethol yn annog pobl i ddiogelu eu cyfrifon, i bwyllo cyn prynu ac i ddefnyddio dulliau talu diogel wrth siopa ar-lein. Cynghorion:

• Defnyddiwch y broses dilysu dau gam a chrëwch gyfrinair gan ddewis tri gair ar hap i atal seiberdroseddwyr rhag cael mynediad i'ch cyfrif siopa, cyfrif banc neu gyfrif e-bost.
• Ymchwiliwch i fanwerthwyr ar-lein, yn enwedig os nad ydych chi wedi prynu unrhyw beth ganddynt o'r blaen, er mwyn sicrhau eu bod yn ddilys. Darllenwch adborth gan bobl neu sefydliadau rydych yn ymddiried ynddynt, fel gwefannau defnyddwyr.
• Defnyddiwch gerdyn credyd wrth siopa ar-lein, os oes un gennych. Mae'r rhan fwyf o ddarparwyr cardiau credyd yn diogelu eitemau a brynir ar-lein ac yn gorfod eich ad-dalu dan rai amgylchiadau. Mae defnyddio cerdyn credyd (yn hytrach na cherdyn debyd) hefyd yn golygu nad effeithir yn uniongyrchol ar eich prif gyfrif banc os caiff eich manylion talu eu dwyn. Hefyd, ystyriwch ddefnyddio llwyfan talu, fel PayPal, Google neu Apple Pay. Edrychwch am y clo clap wedi'i gau yn y bar cyfeiriad wrth dalu bob amser – mae hyn yn golygu bod eich cyswllt yn ddiogel.

Am ragor o gyngor ar siopa ar-lein yn ddiogel, ewch i: https://www.ncsc.gov.uk/guidance/shopping-online-securely