Ein hymrwymiad i drawsnewid ymchwiliadau trais rhywiol.

Heddiw, mae Heddlu De Cymru wedi croesawu adroddiad sy'n amlinellu cynnydd o ran y newidiadau trawsnewidiol sydd eu hangen i wella profiadau dioddefwyr trais ac ymosodiadau rhywiol difrifol, cynyddu ein rheolaeth dros droseddwyr a gwella cyfraddau euogfarnu.

Yn dilyn adolygiad o drais rhywiol a gynhaliwyd ledled y DU, mae Heddlu De Cymru yn rhan o ddull newydd o ymchwilio i drais rhywiol, sy'n ceisio gwella'r broses o ymchwilio i drais ac ymosodiadau rhywiol difrifol ac ymateb iddynt.

Nod y dull newydd, sef Ymgyrch Soteria, yw lleihau'r tebygolrwydd y bydd unigolion yn aildroseddu a sicrhau bod ymchwiliadau'n fwy trylwyr ac effeithiol.

Heddiw, mae'r Swyddfa Gartref wedi cyhoeddi adroddiad cynnydd ar y dull newydd, sydd eisoes wedi arwain at gynnydd mewn cyfraddau euogfarnu yn Ne Cymru, cyflwyno timau trais rhywiol arbenigol a ffyrdd mwy effeithiol o weithio gyda sefydliadau partner – gyda rhagor o welliannau i ddod yn y Flwyddyn Newydd.

Dywedodd y Ditectif Brif Uwch-arolygydd Phil Sparrow, sy'n arwain Ymgyrch Soteria ar gyfer Heddlu De Cymru: “Rhoddodd canfyddiadau Ymgyrch Soteria y sylfaen dystiolaeth ar gyfer cynnydd sylweddol mewn adnoddau, gan alluogi Heddlu De Cymru i gyflwyno timau ymchwilio arbenigol ym mhob rhan o'r heddlu ar gyfer ymchwilio i achosion o drais rhywiol. Mae'r cymorth gan dîm Ymgyrch Soteria wrth ddatblygu'r gallu arbenigol hwn wedi bod yn werthfawr tu hwnt.

“Ystyrir bod cyfleoedd rheolaidd ar gyfer datblygiad proffesiynol parhaus a chymryd rhan yn y cynllun peilot ar gyfer ymchwilio i drais rhywiol, a ddatblygwyd mewn partneriaeth â'r Coleg Plismona, yn rhan hanfodol o daith ein staff i ddod yn ymchwilwyr arbenigol mewn perthynas â thrais rhywiol. Mae ein gwaith gyda'n partneriaid o Llwybrau Newydd, y sector iechyd a Gwasanaeth Erlyn y Goron wedi cael ei wella, ac rydym wedi gweld swyddogion arbenigol a Gwasanaeth Erlyn y Goron yn nodi cyfleoedd drwy ddull sy'n canolbwyntio ar yr unigolyn dan amheuaeth.

“Arweiniodd un achos o'r fath at ymchwiliad i achosion o drais rhywiol nad ydynt yn rhai diweddar, lle nodwyd bod yr unigolyn dan amheuaeth wedi cyflawni trosedd mewn rhan arall o'r wlad. Cafodd yr achosion eu huno yn dilyn hynny a'u clywed yn y llys ar yr un pryd, lle cafodd yr unigolyn ei euogfarnu am y ddwy drosedd.

“Gan weithio'n agos gyda'n cydweithwyr yng Ngwasanaeth Erlyn y Goron Cymru, rydym wedi gweld cynnydd graddol yn y defnydd o gyngor cynnar ac, ers cyflwyno'r timau arbenigol, mae ein cyfradd euogfarnu wedi cynyddu o 5.7% i 9.6% hyd yn hyn eleni. Yn ogystal, cawsom adborth cadarnhaol gan Arolygiaeth Ei Fawrhydi ar ansawdd ymchwiliadau ein tîm trais rhywiol.

“Byddwn yn lansio ein cynllun gweithredu newydd yn y flwyddyn newydd pan gaiff manylion pellach eu rhyddhau ar sut y byddwn yn defnyddio'r gwersi a ddysgwyd o Ymgyrch Soteria i ymgorffori arferion newydd yn ein timau yn Ne Cymru i ysgogi newid a gwelliannau pellach.”