Ymosodiad yn Nhredelerch: Apêl am ddeunydd fideo teledu cylch cyfyng a deunydd fideo arall

Mae Heddlu De Cymru yn ymchwilio i ddigwyddiad a arweiniodd at ganfod dyn a oedd wedi cwympo i'r llawr ar y ffordd ger Fferm Cefn Mably yn Llanfihangel-y-fedw, Caerdydd.

Cafodd y dyn 35 oed, yr oedd rhywun wedi ymosod arno, ei ganfod gan aelod o'r cyhoedd ar Began Road am 6.15 neithiwr (nos Lun 6 Mehefin).

Aethpwyd ag ef i Ysbyty Athrofaol Cymru, Caerdydd, am driniaeth. Dywedir nad yw ei anafiadau yn rhai sy'n bygwth bywyd nac yn newid bywyd.

Dywedodd y Ditectif Ringyll, Greg Burns o Heddlu De Cymru:

“Cynhaliwyd ymholiadau helaeth i arestio'r unigolion dan amheuaeth neithiwr ac mae'r ymholiadau hyn yn parhau heddiw. Gall preswylwyr lleol ddisgwyl gweld mwy o swyddogion yr heddlu yn yr ardal ac rydym yn apelio ar unrhyw un sydd â gwybodaeth i gysylltu â ni.
“Gwyddom fod yr unigolyn yr ymosodwyd arno yn eistedd ger arhosfan bysiau ar Burnham Avenue, Tredelerch, tua 5.25pm pan gafodd ei orfodi i mewn i fan lwyd gan ddau ddyn anhysbys.
“Daeth y cerbyd o gyfeiriad Ball Road a gyrrodd i ffwrdd i gyfeiriad Countisbury Avenue. Daethpwyd o hyd iddo yn ddiweddarach ar dân ym Mryncyn, Pen-twyn.
“Rydym yn apelio ar unrhyw un sy'n byw neu'n gweithio yn yr ardaloedd hyn sydd â deunydd fideo teledu cylch cyfyng neu gamera dashfwrdd a allai fod wedi ffilmio unrhyw ran o'r digwyddiad hwn i gysylltu â ni.”

Gofynnir i unrhyw un sydd â gwybodaeth neu ddeunydd fideo gysylltu â Heddlu De Cymru drwy 101 neu https://bit.ly/SWPProvideInfo gan ddyfynnu'r rhif cyfeirnod *189180.