Anrhydeddau Pen-blwydd Jiwbilî'r Frenhines – dyfarnu MBE i Marcia Gittens o #TîmHDC

Llongyfarchiadau i Marcia Gittens o #TîmHDC sydd newydd gael MBE ar restr Anrhydeddau Pen-blwydd Jiwbilî'r Frenhines, a hynny ychydig wythnosau ar ôl ennill gwobrau cenedlaethol a rhyngwladol yn ei henwi'n Weithiwr Sifilaidd yr Heddlu y Flwyddyn.

A hithau'n cael ei hanrhydeddu am ei gwasanaeth i Amrywiaeth mewn Plismona, gellir dadlau y bydd yr anrhydedd hwn i Marcia yn fwy cofiadwy na'r rhan fwyaf am ei bod yn ei gael yn ystod blwyddyn y Jiwbilî sy'n dathlu 70 mlynedd o wasanaeth digynsail Ei Mawrhydi.

Cafodd wybod hefyd bod ei henw wedi cael ei gyflwyno ar gyfer y gydnabyddiaeth fawreddog hon ar yr hyn a fyddai wedi bod yn ben-blwydd i'w diweddar fam.

Mae Marcia wedi chwarae rôl hollbwysig i arwain newid ym maes plismona dros yr 20 mlynedd diwethaf, gan sicrhau bod swyddogion, staff a chymunedau yn cael eu trin yn gydradd, gydag urddas a pharch.

Mae ei chyflawniadau niferus yn cynnwys bod yn un o sefydlwyr Cymdeithas yr Heddlu Du Heddlu De Cymru, y mae'n ei chydgadeirio ar hyn o bryd; arwain y gwaith o lunio adroddiadau a pholisïau lleol a chenedlaethol sy'n ymwneud â chydraddoldeb, recriwtio a chadw staff a hil, a rhoi cyngor arnynt; a gwaith gwirfoddol helaeth.

Gan sôn am y gymeradwyaeth frenhinol y mae wedi'i chael, dywedodd Marcia:

“Pan gyrhaeddodd y llythyr ar ben-blwydd fy mam, roeddwn i'n llawn dagrau. Ni allwn siarad. Roedd hi'n teimlo fel yr anrheg berffaith ganddi ac rwy'n gwybod y byddai wedi bod mor falch.

“Mae mor braf cael fy nghydnabod ond nid oes dim ohono – y gwaith rwy'n ei wneud na fy ngwaith gwirfoddol gyda Chymdeithas yr Heddlu Du ac eraill – yn cael ei wneud gen i ar fy mhen fy hun. Ni fyddai dim ohono yn bosibl heb gryn dipyn o gefnogaeth gan fy nheulu a'm ffrindiau gwych ac amyneddgar a rheolwyr a chydweithwyr da iawn.

“Allwch chi ddim ei wneud ar eich pen eich hun, felly byddwn ar fai pe na bawn yn cydnabod pawb sydd wedi fy helpu a'm cefnogi.

“Byddaf bob amser yn dweud pan fydd un yn ennill, bydd pawb yn ennill, ac rwy'n teimlo bod yr MBE hwn yn rhywbeth y gallwn i gyd ei rannu a'i ddathlu a bod yn falch ohono.”

Ychwanegodd y Prif Gwnstabl Jeremy Vaughan: “Mae Marcia yn llawn haeddu'r anrhydedd hwn. Ers ymuno â Heddlu De Cymru, mae wedi ymroi i wella plismona, gan sicrhau bod y gweithle yn lle tecach a mwy cyfartal i bawb ac, yn arbennig, y rhai a fu heb gynrychiolaeth ddigonol yn draddodiadol, gan gynnwys menywod ac aelodau o'n cymunedau Du, Asiaidd ac Ethnig Leiafrifol.

“Wrth i ni ymdrechu'n barhaus i greu gweithle mwy cynrychioliadol, bydd hyn o fudd i Heddlu De Cymru a'r bobl a wasanaethir gennym.

“Yn ddiweddar iawn enwyd Marcia yn Weithiwr Sifilaidd y Flwyddyn Cymdeithas Prydain ar gyfer Menywod yn yr Heddlu (BAWP) a Chymdeithas Ryngwladol y Plismonesau (IAWP) o ganlyniad i'w gwaith. Mae'r negeseuon o gefnogaeth a'r llongyfarchiadau y mae wedi'u cael gan gydweithwyr ac aelodau o'r cyhoedd fel ei gilydd yn dangos y parch mawr sydd gan bobl tuag ati.

“Rydym yn ffodus iawn ei bod yn rhan o #TîmHDC.”

Cysylltiedig: