Mae ymddygiad gwrthgymdeithasol ar hyd arfordir Caerdydd a'r Fro wedi mwy na haneru dros y ddwy flynedd ddiwethaf.

Mae ymddygiad gwrthgymdeithasol ar hyd arfordir Caerdydd a'r Fro wedi mwy na haneru dros y ddwy flynedd ddiwethaf.

Mae'r gostyngiad i'w weld er gwaetha'r ffaith fod nifer yr ymwelwyr â'n harfordir wedi dychwelyd i lefelau cyn y pandemig yn ystod yr haf eleni.

Rhwng mis Gorffennaf a mis Medi, gwnaeth nifer y digwyddiadau y rhoddwyd gwybod amdanynt ostwng 43% o 2020 i 2021 a 12% pellach yn 2022.

Mae hyn yn deillio o waith Ymgyrch Elstree, sef ymgyrch amlasiantaethol sydd â'r nod o gadw ardaloedd arfordirol yn ddiogel a sicrhau eu bod yn ystyriol o deuluoedd.

Ar y cyd â'r Heddlu Trafnidiaeth Prydeinig, Gwasanaeth Ambiwlans Cymru, Sefydliad Cenedlaethol Brenhinol y Badau Achub (RNLI), Tân ac Achub De Cymru, awdurdodau lleol a busnesau, dyma rai o'r ffyrdd y mae #YmgyrchElstree wedi eich cadw'n ddiogel:

• Patrolau ychwanegol ar droed, ar gefn ceffyl, ar feic cwad ac mewn cwch.
• Hysbysiadau Adran 35 i symud pobl ymlaen.
• Fan teledu cylch cyfyng mewn lleoliadau allweddol.
• Bandiau diogelwch i aduno plant coll â'u teuluoedd.
• Dirwyon ar gyfer parcio anghyfreithlon.
• Digwyddiadau addysgol ar y cyd.

 

Dywedodd Stuart McDean, Arolygydd Cymdogaeth Bae Caerdydd a Phenarth:
“Mae Ymgyrch Elstree wedi golygu 1,000 o oriau ychwanegol o batrolau ar droed gan yr heddlu ar hyd arfordir Caerdydd a Bro Morgannwg, llawer ohonynt gan wirfoddolwyr o'r Gwnstabliaeth Wirfoddol.
“Yn ystod y patrolau hyn rydym wedi arestio 23 o bobl ac wedi atafaelu alcohol sydd wedi helpu i atal yr ymddygiad gwrthgymdeithasol a welwyd dros y blynyddoedd diwethaf.
“Un o uchafbwyntiau eraill Ymgyrch Elstree yw ein bod wedi aduno plant coll â'u rhieni ar y traeth. Gall colli golwg ar eich plant am ychydig eiliadau beri pryder mawr, felly rwy'n falch bod ein swyddogion wedi bod yn y lle iawn ar yr adeg iawn yr haf hwn.
“Mae wedi bod yn ymdrech tîm go iawn ac rydym yn gobeithio bod pawb a ymwelodd ag arfordir Caerdydd a Bro Morgannwg yr haf hwn wedi cael profiad cadarnhaol.”