Prif Weinidog Cymru'n agor Canolfan Ddysgu newydd yr Heddlu, Tŷ Morgannwg, yn swyddogol.

Agorodd y Prif Weinidog, Mark Drakeford AS, gyfleuster dysgu newydd o'r radd flaenaf ym mhencadlys Heddlu De Cymru ym Mhen-y-bont ar Ogwr heddiw (dydd Gwener 30 Medi).

Mae agor Tŷ Morgannwg, Canolfan Ddysgu newydd yr Heddlu, yn dangos buddsoddiad mawr a fydd yn galluogi swyddogion a staff newydd a phresennol yr heddlu yn Ne Cymru i gael hyfforddiant effeithiol.

Yn dilyn adolygiad strategol o'i ystad a gan ystyried y rhaglen recriwtio genedlaethol i gynyddu nifer y swyddogion, mae Heddlu De Cymru wedi creu cyfleuster hyfforddiant modern, effeithlon ac addas at y diben yn lle'r hen gyfleusterau a oedd mewn lleoliadau gwahanol ledled ardal yr heddlu. Bydd y gwaith rhesymoli a moderneiddio hwn yn arbed arian dros y tymor hwy.

Bydd y cyfleuster pwrpasol hwn yn gartref i'r holl ofynion addysgu, a hynny mewn un adeilad, ar un safle. Mae'r adeilad pedwar llawr yn lleoliad parhaol ar gyfer Gwasanaethau Dysgu a Datblygu ac Adnoddau Dynol.

Y tu mewn i'r cyfleuster hyfforddiant mae dwy ystafell hyfforddi fawr ar gyfer profion ffitrwydd, hyfforddiant ar ddefnyddio gynnau taser a hyfforddiant diogelwch swyddogion, ynghyd ag ystafelloedd dosbarth a darlithfa.

Dywedodd Comisiynydd yr Heddlu a Throseddu, Alun Michael:

“Mae datblygiad Canolfan Ddysgu'r Heddlu ym Mhencadlys yr Heddlu yn fuddsoddiad mawr yn hyfforddiant swyddogion a staff newydd a phresennol yr heddlu, heddiw ac i'r dyfodol.

“Mae recriwtio niferoedd ychwanegol o swyddogion yr heddlu a Swyddogion Cymorth Cymunedol yr Heddlu yn ogystal â recriwtio yn lle'r rhai sy'n ymddeol cyn hir yn golygu bod yn rhaid i Heddlu De Cymru recriwtio a hyfforddi tua 1,000 o swyddogion newydd dros y tair blynedd nesaf. Mae'n dasg anferthol ac mae'n hollbwysig bod gennym y cyfleusterau iawn i gyflawni hyn.

“Mae hyfforddiant wedi'i foderneiddio'n llwyr yn ystod y blynyddoedd diwethaf felly bydd y cyfleusterau newydd hyn yn ein galluogi i ddarparu hyfforddiant o ansawdd uchel y byddai'r cyhoedd yn disgwyl i ni ei ddarparu ar gyfer swyddogion yr heddlu yn y dyfodol.”

Tan nawr, mae ein cyfleusterau hyfforddiant wedi'u lleoli ledled ardal yr heddlu ac, o ganlyniad i ddiffyg buddsoddi, mae rhai adeiladau mewn cyflwr gwael iawn gan gynnwys y defnydd o gabanau symudol.

Mae'r datblygiad newydd gwerth £28m yn rhan o strategaeth 10 mlynedd i ddisodli nifer o hen adeiladau sy'n ddrud i'w hatgyweirio a'u cynnal a chadw.  Ariennir rhan o'r cynllun hwn drwy werthu nifer o safleoedd a fydd yn rhoi derbyniadau cyfalaf o £24m, arbediad o £19m ar gostau a fyddai wedi bod yn angenrheidiol i redeg hen adeiladau a gostyngiad o £2m mewn costau rhedeg blynyddol.

Mae rhaglen Recriwtio'r Llywodraeth i benodi 20,000 o swyddogion yr heddlu yn ogystal â chymryd lle'r rhai sy'n ymddeol cyn hir yn golygu bod yn rhaid i Heddlu De Cymru recriwtio a hyfforddi tua 1,000 o swyddogion newydd dros gyfnod o dair blynedd. Bydd rhan o'r hyfforddiant yn digwydd yn yr ystafell ddosbarth sy'n gofyn am nifer o ystafelloedd ymneilltuo a chyfleusterau cyfarfod.

Dywedodd y Prif Swyddog Ariannol, Umar Hussain:

“Mae gan Heddlu De Cymru hanes profedig o reoli adnoddau'n gadarn ac ailddatblygu ei ystad a hefyd gynnal gwasanaeth brys 24/7 effeithiol ar yr un pryd. Mae ein cyfleusterau hyfforddi newydd yn rhywbeth y gallwn ymfalchïo ynddo ac yn rhywbeth y mae ein swyddogion newydd a phresennol yn ei haeddu. Rydym wedi gweithio gyda'n partneriaid dros nifer o flynyddoedd i ddarparu gwasanaethau gwell sy'n cynnig gwerth gwell am arian i'r cyhoedd drwy beidio â gwario arian ar atgyweirio hen adeiladau a thrwy hynny greu arbedion sylweddol ar gostau rhedeg.

“Mae hyn yn cynnwys darparu cyfleusterau gwell i'n swyddogion rheng flaen a'n staff gyda gorsafoedd a dalfeydd newydd ym Mae Caerdydd, Pen-y-bont ar Ogwr a Merthyr Tudful, gorsaf newydd yn Nhonysguboriau, canolfan gwasanaethau cyhoeddus newydd ar y cyd i'r heddlu a'r gwasanaeth tân ym Mhen-y-bont ar Ogwr, canolfan cynnal a chadw cerbydau newydd ar y cyd â Chyngor Pen-y-bont ar Ogwr a chyfleusterau cymunedol a rennir megis Hwb Llanedeyrn ar y cyd â Chyngor Caerdydd a Gorsaf Gwasanaethau Brys newydd ar gyfer pedwar partner yn Llanilltud Fawr.”

Dywedodd y Prif Weinidog Mark Drakeford:

“Mae'n bleser gennyf ddadorchuddio'r plac coffa ar gyfer y ganolfan ddysgu newydd ym mhencadlys Heddlu De Cymru. Bydd y buddsoddiad mawr hwn yn talu ar ei ganfed er mwyn hyfforddi swyddogion a staff newydd a phresennol yr heddlu yn Ne Cymru.

“Mae hyfforddiant a datblygiad proffesiynol yn helpu i greu swyddogion yr heddlu effeithiol ac yn helpu i gadw ein cymunedau yn ddiogel.”