Ein hymrwymiad i fynd i'r afael â thrais yn erbyn menywod a merched

Dros y 12 mis diwethaf, mae Heddlu De Cymru wedi cyflwyno cyfres o fesurau newydd fel rhan o'i ymrwymiad parhaus i fynd i'r afael â thrais yn erbyn menywod a merched.

Drwy weithio gydag ystod o sefydliadau partner, rydym wedi parhau i dargedu adnoddau er mwyn sicrhau llwybrau clir i ddiogelwch ar gyfer dioddefwyr, cefnogi a grymuso goroeswyr a buddsoddi mewn ymyriadau seiliedig ar dystiolaeth sy'n mynd i'r afael ag achosion sylfaenol, gan ymdrin â'r agweddau a'r ymddygiadau niweidiol sy'n arwain at drais a chamdriniaeth.

Mae Heddlu De Cymru wedi dod yn heddlu peilot ar gyfer Ymgyrch Soteria sy'n gobeithio trawsnewid y ffordd yr ymchwilir i achosion o dreisio a throseddau rhywiol difrifol. Mae'r peilot eisoes wedi ymroi i sicrhau na fydd unrhyw un sydd wedi cael ei dreisio heb ffôn symudol am fwy na 24 awr – mae hyn yn cael ei gyflawni drwy fuddsoddi mewn technoleg newydd sy'n cyflymu archwiliadau o ffonau symudol, sydd yn aml yn hollbwysig er mwyn cael tystiolaeth ar gyfer erlyniadau llwyddiannus.

Mae nifer o ymgyrchoedd a mesurau ymarferol hefyd wedi'u cyflwyno er mwyn atal achosion rhag digwydd ac i wneud i bobl deimlo'n fwy diogel yn eu cymunedau. Mae'r rhain yn cynnwys:

• Ehangu prosiect Bws Diogelwch Heddlu De Cymru sy'n cefnogi pobl sy'n agored i niwed yn yr economi liw nos
• Sefydlu mannau Cymorth ar y Stryd – intercoms mewn tri lleoliad allweddol yng Nghaerdydd i roi mynediad uniongyrchol i'r heddlu a gweithwyr gwasanaethau brys i breswylwyr pan fyddant yn teimlo o dan fygythiad neu'n anniogel.
• Gosod camerâu teledu cylch cyfyng newydd ar y stryd mewn lleoliadau allweddol yng Nghaerdydd a Phen-y-bont ar Ogwr a diweddaru goleuadau mewn tanffyrdd a dargedir.
• Cynyddu nifer y ‘Lleoedd Diogel’ lle y gall pobl geisio cymorth a lloches gan staff sydd wedi'u hyfforddi'n arbennig os byddant yn teimlo o dan fygythiad.
• Hyfforddiant i staff tafarndai, clybiau a bwytai a gyrwyr tacsi ym Merthyr Tudful ynghylch sut i nodi a helpu pobl mewn sefyllfaoedd bregus, yn ogystal â theledu cylch cyfyng wedi'i uwchraddio yng nghanol y dref.
• Cynhaliwyd arolygon diogelwch yng Nghaerdydd, Bro Morgannwg, Abertawe a Chastell-nedd Port Talbot gyda'r adborth yn llywio ymateb yr heddlu i drais yn erbyn menywod a merched.
• Cais llwyddiannus i Gronfa Safety of Women at Night, er mwyn hyrwyddo diogelwch menywod yn yr economi liw nos yn Abertawe, gan gynnwys rhoi hyfforddiant ar fregusrwydd i'r holl staff sy'n gweithio yn yr economi liw nos er mwyn sefydlu lleoedd diogel.
• Ymgyrchoedd yng nghanol dinas Abertawe lle mae swyddogion arbenigol yr heddlu'n cynnal patrolau i nodi unrhyw un a all fod yn dangos arwyddion o ymddygiad sy'n peri gofid neu ymddygiad rheibus a'r rhai a all fod yn agored i niwed – nodwyd bod 62 o fenywod a oedd ar eu pen eu hunain yn agored i niwed a chawsant eu diogelu, a chafodd 41 o wrywod ac 20 o gyplau eu stopio, gan arwain at naw ohonynt yn cael eu gwahanu.

Fel rhan o strategaeth Llywodraeth y DU i fynd i'r afael â thrais yn erbyn menywod a merched, mae Heddlu De Cymru hefyd wedi hyrwyddo adnodd ar-lein newydd o'r enw StreetSafe sy'n galluogi pobl i nodi lleoliadau lle maent wedi teimlo'n anniogel a nodi pam eu bod wedi teimlo'n anniogel yn y lleoliad hwnnw. Gan ddefnyddio'r wybodaeth honno, gallwn gyfarwyddo ein patrolau a mynd ati gyda'n partneriaid i wella seilwaith megis goleuadau a systemau teledu cylch cyfyng.

Dywedodd y Ditectif Prif Arolygydd Mark Lewis, sef arweinydd yr heddlu ar drais yn erbyn menywod a merched:

“Mae gan bawb yr hawl i fod yn ddiogel yn eu cartref a'u cymuned ond mae'r un mor bwysig i bobl deimlo'n ddiogel wrth fynd o gwmpas eu pethau yng nghanol ein trefi a'n dinasoedd.

“Dyma pam, ochr yn ochr â'r gefnogaeth sydd gennym ar waith i ddioddefwyr troseddau ac ymrwymiad i ymchwilio i bob math o drais a chamdriniaeth, y mae'n bwysig ein bod yn gwneud popeth o fewn ein gallu i atal digwyddiadau rhag digwydd ar ein strydoedd a bod gennym fesurau ar waith drwy weithio gydag awdurdodau lleol a phartneriaid eraill i wneud i bobl deimlo'n ddiogel.

“Gwyddom fod pryder cyffredinol am ddiogelwch y cyhoedd, yn enwedig ymhlith menywod a merched, ac rydym wedi gwneud cryn ymdrech i ddeall eu pryderon drwy arolygon ac adnoddau adrodd ar-lein gwahanol i wrando ac ymateb drwy dargedu ein patrolau a gweithio gyda phartneriaid i fynd i'r afael â nhw.

“Gwnaed cryn ymdrech ac ymrwymiad i fynd i'r afael â'r materion pwysig hyn ac er i ni gyflawni llawer dros y 12 mis diwethaf, mae mwy i'w wneud o hyd ac mae angen ymrwymo i wneud ein cymunedau mor ddiogel â phosibl.”

Dywedodd Dirprwy Gomisiynydd yr Heddlu a Throseddu, Emma Wools:

"Rwy'n falch iawn o weld y mentrau gwahanol sy'n cael eu cynnal ledled De Cymru, y mae llawer ohonynt wedi'u hariannu diolch i'n ceisiadau llwyddiannus i Gronfa Strydoedd Mwy Diogel y Swyddfa Gartref.

“Mae'r grantiau hyn yn cymeradwyo ein dull o weithio mewn partneriaeth. Rydym wedi gweithio'n agos gyda'r cynghorau a phartneriaid eraill i nodi'n fanwl y ffactorau sy'n ysgogi problemau lleol a'r ffordd orau o fynd i'r afael â nhw gyda'n gilydd.

“Mae hyn yn cael ei fuddsoddi mewn gwneud y strydoedd yn fwy diogel i fenywod a merched. Mae atal trais yn erbyn menywod a merched wedi bod yn flaenoriaeth benodol i'r Comisiynydd a'i dîm erioed ac er ein bod wedi gwneud cryn dipyn i fynd i'r afael â'r broblem yn Ne Cymru, erys yn un o'r problemau mwyaf a wynebwn ac mae'n rhaid i ni ymdrechu i wneud mwy bob amser er mwyn ceisio gweld gostyngiad sylweddol yn nifer yr achosion o fygylu ac aflonyddu a brofir gan fenywod a merched yn ein cymunedau.

“Ochr yn ochr ag ymateb gweithredol swyddogion yr heddlu, gan weithio mewn partneriaeth, byddwn yn canolbwyntio ar fanteision uniongyrchol mesurau ymarferol fel systemau teledu cylch cyfyng a gwelliannau ffisegol i'r amgylchedd, a hefyd ar sicrhau gwelliannau hirdymor cynaliadwy i greu cymunedau diogel, hyderus a chydnerth.”