Dau a fu'n delio mewn cyffuriau yn cael eu carcharu am naw mlynedd a phedwar mis

Cafodd dau ddeliwr cyffuriau a ddaliwyd yng nghanol tref Aberdâr gyda heroin ac arian parod eu carcharu'n ddiweddar.

Jonathan Hayton

Matthew Read

Ymddangosodd Jonathan Hayton, 41, o Erw Las, Penywaun, a Matthew Read, heb gartref sefydlog, yn Llys y Goron Merthyr Tudful ar 17 Ionawr a chawsant eu carcharu am gyfanswm o naw mlynedd a phedwar mis.

Cawsant eu stopio a'u chwilio gan swyddogion o dîm Ymgyrch Sceptre yng Nghanol Tref Aberdâr ar 1 Rhagfyr ar ôl cael eu gweld yn gyrru i ffwrdd yn gyflym o swyddogion mewn BMW du. Cafodd heroin ac arian parod eu hatafaelu ac aethpwyd â nhw i'r ddalfa.

Sefydlwyd timau Ymgyrch Sceptre gan Heddlu De Cymru er mwyn mynd i'r afael â throseddau cyfundrefnol a delio mewn cyffuriau.

Yn ystod chwiliad yng ngorsaf yr heddlu, canfuwyd bod Hayton yn cuddio heroin a ffôn symudol yn ei lodrau isaf.

Chwiliodd swyddogion yr heddlu ddau eiddo a oedd yn gysylltiedig â'r dynion hefyd a chanfod miloedd o bunnau mewn arian parod.

Datgelodd gwaith dadansoddi fforensig a wnaed ar eu ffonau symudol negeseuon a oedd yn amlwg yn gysylltiedig â delio mewn cyffuriau.

Cafodd cyfanswm o 58 o wrapiau o heroin ac arian parod gwerth mwy na £2000 eu hatafaelu.

Plediodd Matthew Read yn euog o fod â heroin yn ei feddiant gyda'r bwriad o'i gyflenwi a hefyd o fod yn ymwneud â chyflenwi heroin. Cafodd ei garcharu am chwe blynedd.

Plediodd Jonathan Hayton yn euog o fod â heroin yn ei feddiant gyda'r bwriad o'i gyflenwi a chafodd ei garcharu am dair blynedd a phedwar mis.

Dywedodd y Ditectif Ringyll Gareth Jenkins:

"Aeth y ddau ddyn i banig pan wnaethant ein gweld a gyrru i ffwrdd yn gyflym. Ond o fewn awr roeddent wedi dychwelyd, yn ddiau er mwyn gwerthu cyffuriau i'w cwsmeriaid disgwylgar, ond roeddem yn aros amdanynt a gwnaethom eu harestio.

"Roedd y dynion hyn yn llythrennol yn pedlo trallod ar strydoedd Aberdâr. Mae dioddefaint na ellir ei ddychmygu yn cael ei achosi gan gaethiwed i gyffuriau ac maent yn ei fwydo er mwyn eu mantais bersonol eu hunain. Y carchar yw'r lle iddyn nhw.”