Enwi aelod staff yn Ddinesydd y Flwyddyn mewn seremoni wobrwyo ryngwladol

Llongyfarchiadau mawr i Marcia Gittens o #TîmHDC, sydd wedi ennill gwobr ryngwladol am ei hymrwymiad i wella plismona i bawb.

Mae Marcia, sy'n arwain ein Huned Rheoli Achosion o fewn ein Hadran Adnoddau Dynol, wedi cael ei henwi yn Ddinesydd y Flwyddyn gan y Gymdeithas Genedlaethol ar gyfer Menywod yn yr Heddlu.

Mae Marcia wedi bod yn allweddol yn arwain newid o fewn plismona dros yr ugain mlynedd diwethaf, gan sicrhau y caiff swyddogion, staff a chymunedau eu trin yn gyfartal, a gydag urddas a pharch.

Wedi ei disgrifio fel “menyw flaengar ac ysbrydoledig”, mae ei gorchestion yn cynnwys:

• Bod yn un o sylfaenwyr Cymdeithas Heddlu Du De Cymru (BPA), y BPA Cenedlaethol (NBPA) a BPA Cymru. Hi yw cyd-gadeirydd presennol BPA De Cymru;
• Fel Is-gadeirydd yr NBPA drafftiodd yr unig adroddiad cyhoeddedig ar fenywod BAME mewn plismona a gwnaeth argymhellion ar gyfer cadw, hyrwyddo a datblygu swyddogion a staff benywaidd BAME;
• Bod yn aelod o Weithgor Ymgynghorol Stephen Lawrence yr NBPA ac arwain eu Gweithgor Agenda Rhywedd;
• Ymgysylltu â grwpiau cymunedol gan gynnwys Stonewall, Anabledd Cymru, Canolfan Affricanaidd Cymru, Gwasanaeth Erlyn y Goron a grwpiau cymunedol eraill ynghyd â sefydliadau cyfiawnder troseddol er mwyn gwella cydlyniant cymunedol;
• Gwaith gwirfoddol yn y gymuned gan gynnwys cyflwyno’r rhaglen Arweinwyr Naturiol i bobl ifanc o gefndiroedd cymysg i’w grymuso i gyflawni eu potensial, a gweithio gydag elusennau The Gloves Are On a See, Speak Save.
• Bod yn aelod o Bwyllgor Rheoli Hanes Pobl Dduon Cymru, grŵp COVID ar gyfer Arweinwyr BAME a Chanolfan Ddiwylliannol RCC Caerdydd.
• Cyd-gynhyrchodd y calendr Hanes Pobl Dduon cyntaf ar gyfer busnesau a sefydliadau addysgol.

Dywedodd y Prif Gwnstabl Jeremy Vaughan:

“Rwyf wrth fy modd bod cyfraniad eithriadol Marcia ym maes plismona wedi cael ei gydnabod. Mae'n gwbl haeddiannol! Rwy'n hapus iawn drosti, ac rwyf i – ynghyd â gweddill #TîmHDC – yn falch iawn o bopeth y mae wedi llwyddo i'w wneud i'w hun, ar gyfer plismona, ac ar gyfer y cymunedau rydym yn eu gwasanaethu.”