Cynllun Gweithredu Hil yr Heddlu – Gwella plismona ar gyfer pobl ddu
Cynnwys y prif erthygl
Mae Heddlu De Cymru yn llwyr gefnogi Cynllun Gweithredu Hil cenedlaethol newydd yr Heddlu sy'n cael ei gyhoeddi heddiw.
Mae'r cynllun yn nodi nifer o argymhellion er mwyn helpu i ddatblygu gwasanaeth heddlu gwrth-hiliol ac yn cynnwys nifer o ymrwymiadau i sicrhau na chaiff hiliaeth ei goddef ym maes plismona a bod swyddogion a staff yn deall hanes plismona pobl a chymunedau du, ac i feithrin gweithlu mwy cynrychioliadol, sicrhau bod mwy o gymunedau du yn ymwneud â'r broses blismona a gwella'r cymorth a roddir i bobl ddu sy'n ddioddefwyr troseddau.
Er bod Heddlu De Cymru yn croesawu'r cynllun ac yn gwbl ymrwymedig i'w roi ar waith yn lleol, mae llawer o agweddau'r cynllun yn feysydd y mae'r heddlu eisoes wedi dangos ymrwymiad iddynt dros flynyddoedd lawer, gan gynnwys meithrin gweithlu mwy cynrychioliadol a gweithio gyda'r gymuned ddu ar faterion fel anghymesuredd wrth ddefnyddio pwerau'r heddlu.
Dywedodd y Prif Gwnstabl Jeremy Vaughan:
“Nod y cynllun gweithredu a gyhoeddir heddiw yw mynd i'r afael â gwahaniaethau ar sail hil sy'n effeithio ar bobl ddu ym maes plismona, a welir ar sawl ffurf, a thrawsffurfio etifeddiaeth o ddiffyg ymddiriedaeth mewn plismona.
“Mae cyfreithlondeb ac effeithiolrwydd y gwaith o blismona cymunedau De Cymru yn seiliedig ar gydberthnasau rhwng yr heddlu a'r cyhoedd ac rwy'n derbyn bod heriau yn gysylltiedig â'n cydberthynas â phobl ddu. Dylai pob un o'n cymunedau ymddiried yn llwyr ynom ond mae'r data yn nodi bod lefelau ymddiriedaeth a hyder llawer is ymhlith rhai pobl ddu a bod yna wahaniaethau ar sail hil na allwn eu hesbonio'n llawn ond rydym yn gweithio'n galed i'w deall a'u gwella.
“Mae cyffredinrwydd hiliaeth mewn cymdeithas yn ddiymwad a rhaid rhoi terfyn ar agweddau hiliol ffiaidd rhai pobl yn ein cymunedau.
“Yn ne Cymru, rydym wedi gwneud ymdrech wirioneddol i fynd i'r afael â rhai o'r materion hirsefydledig hyn. Er enghraifft, mae ein hymrwymiad i greu gweithlu cynrychioliadol wedi bod ar waith ers wyth mlynedd ar ffurf tîm dynodedig sy'n ymgymryd â gwaith recriwtio gweithredu cadarnhaol ac sy'n hwyluso rhaglen datblygu arweinyddiaeth sydd ar gael i bob aelod ethnig lleiafrifol o staff. Mae wedi bod yn her ond rydym yn gweithio'n galed i groesawu mwy o bobl ddu a phobl ethnig leiafrifol drwy ein drysau.
“O ran y defnydd o bwerau'r heddlu, mae'r gwaith rydym wedi'i wneud eisoes yn cael effaith gadarnhaol ar ein cyfraddau anghymesuredd ond mae'n ffaith bod y defnydd o bwerau stopio a chwilio yn cael effaith anghymesur ar gymunedau pobl ddu. Fodd bynnag, byddwn yn parhau i weithio'n galed i ddeall hyn a dod o hyd i ffyrdd eraill o fynd i'r afael â'r mater mewn ffordd ystyrlon ac effeithiol. Mae ein cyfraddau anghymesuredd yn is na'r cyfartaledd ar gyfer y DU ac wedi parhau i ostwng dros y flwyddyn ddiwethaf.
“Mae pawb yn Heddlu De Cymru yn falch o blismona ardal mor fodern ac amlddiwylliannol sydd â thraddodiad hir o gymunedau cryf ac amrywiol. Fel sefydliad, rydym wedi gwneud, a byddwn yn parhau i wneud buddsoddiadau sylweddol mewn hyfforddiant ac addysg, gan gynnwys hyfforddiant ym meysydd amrywiaeth, cydraddoldeb a chynhwysiant, er mwyn sicrhau bod y cyhoedd yn cael gwasanaeth o'r safon orau bosibl, bod ein swyddogion a'n staff yn deall pynciau fel gwahaniaethau ar sail hil, braint pobl wyn ac anghymesuredd a'n bod yn cynnal sgyrsiau am yr hyn y maent yn ei olygu i'n cymunedau. Fel heddlu, rydym wrthi'n gweithio gydag amrywiaeth o bartneriaid ar Gynllun Gweithredu Cydraddoldeb Hil Llywodraeth Cymru i greu Cymru wrth-hiliol.
“Fel Prif Gwnstabl, rwyf wedi nodi'n glir na fyddaf yn goddef unrhyw fath o aflonyddu nac ymddygiad amhriodol yn y gweithlu, gan gynnwys hiliaeth. Does dim lle yn y gwasanaeth i unrhyw un nad yw ei gydweithwyr yn ymddiried ynddo nac unrhyw un sy'n tanseilio ymddiriedaeth y cyhoedd mewn plismona. Rydym yn cyflogi dros 5,000 o bobl ac yn ymdrin â thros 400,000 o ddigwyddiadau bob blwyddyn, a gwn fod y mwyafrif helaeth o'r bobl hynny yn gweithio'n ddiflino ac yn ymdrechu i wasanaethu eu cymunedau gyda gonestrwydd ac uniondeb, gan ddangos ymddygiad proffesiynol o'r safon uchaf bosibl bob amser.”