Mae gyrrwr a gyfaddefodd iddo achosi anaf difrifol drwy yrru'n beryglus wedi cael ei garcharu

Roedd Michael Francis, 33 oed o'r Hendy, yn gyrru Volkswagen Scirocco glas ar hyd yr A48 yn ystod oriau mân y bore ar 12 Awst 2021. Roedd menyw 20 oed yn y sedd flaen.

Roedd Francis yn gyrru'n gyflym iawn o dan ddylanwad cyffuriau wrth fynd i mewn i bentref Pont-lliw.  Cyrhaeddodd gyflymdra o 75mya mewn ardal 30 mya, cyn gyrru'n gyflym o amgylch cornel ar ochr anghywir y ffordd a gwrthdaro â phostyn lamp ac yna coeden.

 

 

Llwyddodd Francis i adael y car gyda mân anafiadau, ond roedd gan ei deithiwr yr hyn a ddisgrifiwyd gan swyddogion plismona'r ffordd fel yr anafiadau gwaethaf y maen nhw wedi'u gweld mewn gwrthdrawiad lle mae'r dioddefwr wedi byw. 

Mae'n rhaid i'r dioddefwr fyw nawr gyda'r anafiadau hyn sydd wedi newid ei bywyd ac addasu ei ffordd o fyw.

Heddiw, dedfrydwyd Francis i dair blynedd a chwe mis yn y carchar a chafodd ei wahardd rhag gyrru am chwe blynedd a naw mis yn Llys y Goron Abertawe ar ôl iddo bledio'n euog.

Gan siarad ar ôl y ddedfryd, dywedodd yr Uwch-swyddog Ymchwilio, y Ditectif Ringyll Lee Christer:

“Yn dilyn gweithredoedd difeddwl Michael Francis ar y diwrnod hwnnw, mae menyw ifanc wedi cael anafiadau ofnadwy sydd wedi newid ei bywyd.

“Oni bai am ymateb cyflym y swyddogion a'r gwasanaethau brys ar y safle, a'r gofal meddygol arbenigol a gafodd gan staff yn Ysbyty Athrofaol Cymru, nid wyf yn siŵr a fyddai wedi byw.

“Rwy'n gobeithio y bydd y ddedfryd hon yn rhoi cyfle i Francis fyfyrio ar ddifrifoldeb yr hyn a wnaeth.

“Rwyf hefyd yn gobeithio y bydd yn anfon neges gref at yrwyr eraill ac yn eu hannog i feddwl pan fyddant y tu ôl i'r llyw. Goryrru a gyrru o dan ddylanwad cyffuriau yw dau o'r prif ffactorau sy'n achosi gwrthdrawiadau difrifol ac angheuol yng Nghymru, a phan fydd ceir yn cael eu gyrru mewn ffordd fyrbwyll ac anghyfrifol, gallant fod yn arfau marwol, fel y mae'r achos trasig hwn wedi'i brofi.”