Ple euog i ddyn 67 oed am dreisio dieithryn 42 o flynyddoedd yn ôl

Mae dyn 67 oed wedi pledio'n euog i dreisio dieithryn yng Nghaerdydd bron i 42 o flynyddoedd yn ôl.

Mae ei ble yn dilyn ymchwiliad dan arweiniad Uned Adolygu Troseddau Arbenigol Heddlu De Cymru i ddigwyddiad yn ardal y Rhath yng Nghaerdydd ym mis Awst 1980.

Yn sgil datblygiadau mewn profion DNA, bu modd i arbenigwyr ailarchwilio dillad y dioddefwr yn 2019 a pharu'r canlyniadau â Roland Long.

Cafodd Long ei arestio ar 15 Medi 2020 a'i gyhuddo mewn cyfeiriad ym Mryste ar 3 Awst, 2021.

Bydd Long yn ymddangos yn Llys y Goron Caerdydd i gael ei ddedfrydu ar 18 Chwefror, 2022.

 Dywedodd y Ditectif Arolygydd Patrick Catto, cyn-Bennaeth Uned Adolygu Troseddau Arbenigol Heddlu De Cymru:

“Rydym yn parhau i fod yn ymrwymedig i ymchwilio i droseddau difrifol heb eu canfod ac yn ailedrych yn aml ar achosion wrth i wyddoniaeth fforensig ddatblygu.

“Mae ple heddiw'n dangos sut y gall yr ymrwymiad hwn esgor ar ganlyniadau i ddioddefwyr a dod â throseddwyr o flaen eu gwell.

“Mae help a chefnogaeth ar gael i bob dioddefwr trais rhywiol, a byddwn yn annog pob dioddefwr; ni waeth pryd y cafodd y drosedd ei chyflawni, i roi gwybod amdani.”

Ers 2019, mae'r uned a elwir yn Ymgyrch Dudley, wedi bod yn ymchwilio i droseddau rhywiol difrifol heb eu canfod ledled De Cymru sy'n mynd yn ôl sawl degawd.

Mae'r uned wedi cael ei chydnabod yn genedlaethol ac mae wedi defnyddio technegau arloesol i ailagor hen achosion yn y gorffennol.