Dyn yn cael ei ddedfrydu am droseddau cam-drin plant

Mae Joseph D'Agnilli, 71 oed, wedi cael wyth mlynedd o garchar am gam-drin plant.

Cafodd D'Agnilli, o Ddinas Powys, ei ddyfarnu'n euog o wyth cyhuddiad gan gynnwys un cyhuddiad o anwedduster â phlentyn a saith cyhuddiad o ymosod yn rhywiol ar blentyn o dan 13 oed.

Cyflawnodd D'Agnilli'r troseddau rhwng y 1980au a chanol y 2010au.

Ymddangosodd gerbron Llys y Goron Caerdydd heddiw (dydd Iau 13 Ionawr) a chafodd ei roi ar y rhestr Troseddwyr Rhyw Cofrestredig am gyfnod amhenodol hefyd.

Dywedodd y Ditectif Ringyll Gareth Holmes:

"Rydym yn trin pob cyhuddiad o drais rhywiol o ddifrif. Nid yw byth, byth yn rhy hwyr i roi gwybod am drosedd.

"Mae'r holl ddioddefwyr yn yr achos hwn wedi dangos cryfder a dewrder anhygoel wrth roi gwybod am y troseddau hyn a rhoi tystiolaeth yn y treial. Maent wedi bod yn ysbrydoliaeth.

"Rydym yn gobeithio y bydd y ffaith bod Joseph D'Agnilli wedi cael dedfryd o garchar sylweddol yn rhoi rhywfaint o ryddhad iddynt, ac ymdeimlad bod cyfiawnder wedi cael ei weinyddu.

"Fodd bynnag, ni fyddai'r canlyniad hwn wedi bod yn bosibl heb waith caled y Ditectif Gwnstabl Phil Colston, a fu farw y llynedd er mawr tristwch. Arweiniodd Phil yr ymchwiliad hwn a gweithiodd yn agos gyda'r dioddefwyr a phartneriaid er mwyn dwyn y cyhuddiadau. Rwy'n gwybod bod y dioddefwyr a'r tîm cyfan yn ddiolchgar am ei ddyfalbarhad a'i ymrwymiad ac mae'r canlyniad hwn yn golygu bod ei waddol hyd yn oed yn fwy.

"Mae help a chefnogaeth ar gael i bawb sy'n dioddef trais rhywiol, a byddem yn annog pob dioddefwr, ni waeth pryd y digwyddodd y drosedd, i roi gwybod amdani.

Ewch i'n gwefan er mwyn cael gwybod sut mae Heddlu De Cymru yn helpu dioddefwyr achosion o drais ac ymosodiad rhywiol gyda chymorth gan ein sefydliadau partner a grwpiau elusennol: Cefnogaeth i ddioddefwyr achosion o drais ac ymosodiad rhywiol | Heddlu De Cymru (south-wales.police.uk)

Mewn argyfwng, ffoniwch 999 bob amser.