Mae gwerth mwy na £30k o gyffuriau, arian parod a cherbydau wedi cael eu hatafaelu mewn ymgyrch gan yr heddlu yn nwyrain Caerdydd.

Cafodd 51 o bobl eu harestio a chymerwyd 9 arf oddi ar y strydoedd yn ystod yr ymgyrch, wedi'i hanelu at fynd i'r afael â throseddau treisgar.

Dywedodd yr Arolygydd Scott Threadgold o Dîm Plismona yn y Gymdogaeth Llanisien, Tredelerch a Llaneirwg: “Ni chaiff trais na throseddau cyllyll eu goddef ar ein strydoedd a byddwn yn gwneud popeth o fewn ein gallu i dargedu'r rheini sy'n parhau i darfu ar fywydau cymunedau lleol.”

O blith y 51 o arestiadau roedd 10 am drais domestig, 7 am feddu ar arfau, 6 am ymosod a 5 am feddu ar gyffuriau gyda'r bwriad o'u cyflenwi.

Ymhlith yr eitemau a atafaelwyd mae'r canlynol:

• gwerth £22,950 o gyffuriau
• £6k mewn arian parod
• 9 arf
• 5 cerbyd, gan gynnwys 2 feic modur trydan Sur-Ron gwerth tua £3.5k yr un

Cynhaliwyd yr ymgyrch wyth wythnos mewn ymateb i gynnydd yn nifer yr achosion o drais yn gynharach eleni, ac yn benodol oherwydd pryderon bod pobl ifanc yn cario arfau a bod delwyr cyffuriau yn manteisio arnynt i ddelio cyffuriau ar y stryd

Ychwanegodd yr Arolygydd Threadgold: “Nid yn unig y mae pobl ifanc sy’n ymwneud â chyflenwi cyffuriau ac sy’n cario arfau yn rhoi eu hunain mewn sefyllfa agored i niwed, ond gall eu gweithredoedd effeithio ar y gymuned gyfan drwy arwain at gynnydd mewn troseddu ac ymddygiad gwrthgymdeithasol.

“Mae trigolion lleol wedi cysylltu â ni â gwybodaeth, ac rydym wedi targedu’r rheini sy’n achosi’r niwed mwyaf gan gefnogi’r rheini sy’n agored i niwed y gallai rhywun fanteisio arnynt.

“Mae’r gydberthynas dda sy’n bodoli rhwng swyddogion a’r gymuned leol yn un o’r rhesymau pam y mae’r ymgyrch hon wedi bod mor llwyddiannus, ac rydym yn ddiolchgar am y gefnogaeth barhaus. ”

Gofynnir i unrhyw un sydd â gwybodaeth am y materion hyn neu sy’n poeni amdanynt gysylltu â Heddlu De Cymru. Rhowch wybod i ni ar-lein ar https://bit.ly/SWPReportOnline neu drwy ffonio 101. Dylech ffonio 999 mewn argyfwng bob amser.

Er nad yw torseddau cyllyll yn rhan o fywyd beunyddiol yn Ne Cymru, mae'n bwysig ein bod yn parhau i weithredu i atal problem rhag codi.
Ein nod, drwy ein hymgyrch #DdimYrUn, yw addysgu pobl ifanc ynghylch peryglon cario cyllell drwy roi'r adnoddau sydd eu hangen arnynt i rieni, athrawon a grwpiau cymunedol wneud hyn.
I gael gwybod mwy ewch i https://www.nottheone.co.uk/cy