Mae sigaréts, tybaco, cistiau ocsid nitrus, arian parod a cherbydau wedi'u hatafaelu mewn ymgyrch ar y cyd.

Mae sigaréts, tybaco, cistiau ocsid nitrus, arian parod a cherbydau wedi'u hatafaelu mewn ymgyrch ar y cyd.

Mae pedwar dyn wedi'u harestio yn dilyn pryderon gan y gymuned fod sigaréts, e-sigaréts a chistiau ocsid nitrus anghyfreithlon yn cael eu gwerthu i bobl ifanc. 

Mae gwerth tua £125,000 o sigaréts, tybaco, cistiau ocsid nitrus, arian parod a cherbydau wedi'u cymryd oddi ar y strydoedd diolch i ymgyrch ar y cyd rhwng Heddlu De Cymru a'r Gwasanaethau Rheoliadol a Rennir.

Cynhaliwyd archwiliadau a chwiliadau ddydd Iau, 6 Hydref mewn eiddo preswyl a masnachol gyda'r nod o darfu ar droseddwyr a phroblemau cymunedol yng Nghaerdydd a Bro Morgannwg.

 

Mae pedwar dyn wedi'u harestio – dau am wyngalchu arian, un am gymryd rhan mewn busnes twyllodrus ac un arall am feddu ar sylwedd seicoactif gyda'r bwriad o'i gyflenwi.

Dywedodd y Rhingyll Jake Rollnick, o Dîm Plismona yn y Gymdogaeth y Barri: “Cynhaliwyd yr ymgyrch hon mewn ymateb i bryderon gan y gymuned am unigolion yn gwerthu sigaréts, e-sigaréts, tybaco a chistiau ocsid nitrus anghyfreithlon i bobl ifanc a phobl eraill, o safleoedd yn y Rhath a'r Barri.

“Nid yn unig y mae gan werthiant anghyfreithlon yr eitemau hynny oblygiadau iechyd ond maent hefyd yn arwain at ymddygiad gwrthgymdeithasol a throseddoldeb cysylltiedig.

“Rydym yn hyderus y bydd yr atafaeliadau a'r arestiadau arwyddocaol hyn yn cael effaith ddi-oed lle cafodd pryderon eu codi, ond mae'r ymchwiliad yn parhau gydag ymholiadau fforensig ac ariannol.”

Bydd Heddlu De Cymru ac asiantaethau partner yn parhau i fynd ati'n ddiflino i fynd ar drywydd troseddwyr sy'n gweithredu yn ein cymunedau.”

 

Ymhlith yr eitemau a atafaelwyd mae'r canlynol:

 

22,000 o sigaréts gwerth £12,000.

£17,000 o arian parod

133 blwch o gistiau ocsid nitrus gwerth £80,000.

Tri cherbyd, gan gynnwys beic cwad.

 

Caiff Ocsid Nitrus, sy'n cael ei adnabod yn fwy cyffredin fel nwy chwerthin, nos neu chargers, ei werthu mewn cistiau bach lliw arian a chânt eu canfod yn aml wedi'u gadael mewn parciau a mannau agored.

Mae sawl defnydd cyfreithlon iddynt ond, pan gânt eu mewnanadlu, gallant achosi i bobl fynd yn anymwybodol neu farwolaeth yn sgil diffyg ocsigen.

Mae'n anghyfreithlon i unrhyw un yng Nghymru a Lloegr werthu ocsid nitrus i bobl dan 18 oed, os ydynt o'r farn eu bod yn debygol o'i fewnanadlu. Gall cymysgu alcohol ag ocsid nitrus fod yn angheuol.

Ymhlith yr asiantaethau eraill oedd ynghlwm â'r ymgyrch roedd Cyllid a Thollau Ei Fawrhydi ac Awdurdod Meistri Gangiau a Cham-Drin Llafurwyr.

 

Dywedodd y Cynghorydd De'Ath, yr Aelod Cabinet sy'n gyfrifol am Wasanaethau Rheoliadol a Rennir yng Nghyngor Caerdydd:

“Mae tybaco anghyfreithlon yn achosi niwed i gymunedau ledled Cymru, ac mae ei werthu yn cefnogi troseddau cyfundrefnol ac yn cadw arian i ffwrdd o wasanaethau hanfodol. Mae hefyd yn annog smygwyr i barhau i smygu ac yn annog plant i roi cynnig ar smygu.

 

“Os credwch fod rhywun yn gwerthu tybaco anghyfreithlon, gallwch helpu i stopio'r newid mae'n ei achosi drwy roi gwybod i Crimestoppers. Gall eich gwybodaeth helpu i gadw cymunedau ledled Cymru yn ddiogel ac yn iach.”