Cydnabyddiaeth genedlaethol i fyfyrwyr gwirfoddoli yr heddlu

Mae menter Bws Diogelwch Caerdydd i Fyfyrwyr wedi ennill Gwobr Cymorth Gwirfoddolwyr yr Heddlu yng Ngwobrau Swyddfa Gartref yr Arglwydd Ferrers am ei gwaith o redeg bysiau diogelwch gyda'r nos.

Ers mis Medi 2021, mae wedi diogelu dros 2,000 o bobl sy'n agored i niwed ar strydoedd Caerdydd.

Mae dau fws diogelwch yn rhedeg bob nos drwy gydol cyfnod y Glas i ddod o hyd i unigolion agored i niwed, ar eu pen eu hunain, a'u helpu i fynd adref yn ddiogel.

Mae'r bysiau'n parhau i redeg ar y nosweithiau prysuraf.

Dywedodd swyddog cyswllt myfyrwyr, Heddlu De Cymru, PC Michael Neate: “Mae'r bysiau yn helpu 20 o bobl bob nos ar gyfartaledd. Mae rhai yn feddw iawn ac yn wynebu risg amlwg i'w diogelwch personol.

“Mae'r fenter hon yn ein galluogi i adnabod y rheini sydd mewn amgylchiadau bregus ac sydd â'r angen mwyaf, a'u helpu i gyrraedd diogelwch eu cartrefi neu'r Ganolfan Triniaeth Alcohol.”

“Mae Gwobr yr Arglwydd Ferrers yn newyddion gwych i'r gwirfoddolwyr ac yn gydnabyddiaeth haeddiannol dros ben i'r gwasanaeth gwerthfawr a ddarperir gan bobl arbennig.”

Caiff y Bws Diogelwch i Fyfyrwyr ei weithredu gan ein swyddogion a'n gwirfoddolwyr er mwyn helpu i gadw myfyrwyr a'r gymuned ehangach yn ddiogel.

Mae'n gwneud hyn drwy:

• Gadw cyfarpar meddygol hanfodol ar y bws, gan gynnwys diffibriliwr
• Mynd ar batrôl o amgylch ardaloedd economi liw nos Caerdydd a digwyddiadau mawr
• Helpu pobl agored i niwed sydd angen help.

Yn ogystal â'r Bws Diogelwch, bob blwyddyn, mae myfyrwyr-wirfoddolwyr Heddlu De Cymru yn cydweithio â swyddogion yr heddlu ar deithiau crwydr yn rheolaidd, gan ymweld â neuaddau preswyl a llety preifat i groesawu miloedd o fyfyrwyr newydd a myfyrwyr sy'n dychwelyd i Gaerdydd.
Ymwelir â miloedd o fyfyrwyr, a'u cynghori am dueddiadau troseddau lleol cyfredol a sut gallant gadw eu hunain yn ddiogel.
Maent hefyd yn cael eu hatgoffa am ymddygiad da a bod yn gymdogion ystyriol.
Ychwanegodd PC Neate: "Mae gan Gaerdydd draddodiad balch o weithio mewn partneriaeth sy'n cyfrannu at gadw'r ddinas yn ddiogel, ac ni fyddai'n bosibl i ni gyrraedd cynifer o fyfyrwyr heb y myfyrwyr-wirfoddolwyr sy'n gwneud gwaith gwych.

“Ym mis Medi yn unig, gweithiodd ein gwirfoddolwyr fwy na 1,000 o oriau ar ein hymgyrch Myfyrwyr Diogel, gan roi o'u hamser personol i'r Bysiau Diogelwch, digwyddiadau croeso yn y neuaddau preswyl a theithiau crwydr i atal troseddau.”
#MyfyrwyrMwyDiogel #CadwCaerdyddYnDdiogel