Gwrthdrawiad traffig ffordd angheuol ar yr A48: enwi'r unigolyn a'r teulu yn talu teyrnged

Mae'r heddlu yn parhau i ymchwilio i wrthdrawiad traffig ffyrdd angheuol a ddigwyddodd ar yr A48 ger cylchfan Trelales i gyfeiriad Stormy Down tua 9.10 ddydd Sul, 16 Hydref.

Gall swyddogion bellach enwi'r beiciwr a fu farw yn dilyn y gwrthdrawiad.

Roedd Lucy John yn 35 mlwydd oed ac mae ei theulu wedi talu'r deyrnged ganlynol iddi:

“Gyda chalon drom a thristwch mawr mae'n rhaid i ni fel teulu gyhoeddi marwolaeth calon ein teulu - Lucy John (Chilcott gynt).

“Cafodd Lucy John ei lladd mewn ffordd dorcalonnus wrth wneud yr hyn roedd hi'n ei garu a'r hyn a oedd yn helpu i danio egni bywyd mor ddisglair.

“Bu Lucy John mewn gwrthdrawiad â cherbyd modur rhwng Trelales a Stormy Down ar yr A48 fore Sul, wrth feicio ar ei beic ffordd, yr oedd yn ei garu ac yn mor falch ei bod, o'r diwedd, wedi gallu fforddio ei brynu. Yn anffodus, oherwydd ei hanafiadau difrifol bu farw yn y fan a'r lle.

“Roedd Lucy yn fam, yn wraig, yn ferch, yn chwaer, yn wyres, yn gyfnither, yn fodryb, yn nith, yn dreiathletwr, yn athletwraig CrossFit, yn gydweithwraig ac yn ffrind annwyl iawn i lawer o bobl yn y gymuned leol. Roedd bob amser yn llawn egni, gydag agwedd bositif ac angerdd am ei bywyd ei hun a bywyd pawb o'i chwmpas.

“Mae'r cariad a'r gefnogaeth rydym ni fel teulu wedi eu derbyn gan bawb a oedd yn ei hadnabod, o bell ac agos, yn ffynhonnell werthfawr o gysur i aelodau'r teulu yn ystod y cyfnod anodd hwn.

“Hoffem ddiolch yn arbennig i'w theulu CrossFit (CrossFit Pen Y Bont), ei theulu treiathlon (Clwb Tri Pen y Bont) a'i theulu beicio (Tondu Wheelers) a oedd yno iddi bob amser ac sy'n ein cefnogi ni fel teulu nawr. Rydym ni'n anfon llawer o gariad atoch i gyd.

“Oherwydd natur y digwyddiad mae'r broses arferol o ffarwelio â Lucy yn mynd i fod ychydig yn anoddach na'r arfer wrth i'r ymchwiliad llawn fynd yn ei flaen. Unwaith y bydd manylion am y trefniadau ar gael byddant yn cael eu rhannu â phawb er mwyn rhoi cyfle i bawb dalu eu teyrngedau ac i ffarwelio â Lucy.

“Gafaelwch yn dynn yn eich anwyliaid a thrysorwch bob eiliad yn eu cwmni.

“Gyda chariad a diolch i bawb am eich cefnogaeth, wrth ei rhieni – Sharon and Nigel, cannwyll ei llygad - ei mab Caden, ei gŵr cariadus - Evan, ei brawd a'i chwaer agos - Heather a Jason, ei hail rieni cariadus – llys-fam Angela a'i mam a'i thad yng nghyfraith Jayne a Huw, a'i mam-gu, Ann.

“Roedd gan Lucy hefyd deulu estynedig ehangach a oedd yn ei charu ac a fydd yn ei cholli'n fawr.”

Mae'r apêl am dystion posibl yn parhau.

Hoffai swyddogion glywed gan unrhyw un a allai fod wedi gweld y gwrthdrawiad neu y gall fod â fideo camera dashfwrdd o'r digwyddiad neu a fu'n dyst i'r modd yr oedd yr Honda yn cael ei yrru cyn y gwrthdrawiad.

Nid ydym yn chwilio am unrhyw un arall mewn cysylltiad â'r digwyddiad hwn. Arhosodd y gyrrwr ar y safle i gynorthwyo'r swyddogion. Mae'r ymchwiliad yn dal i fynd yn ei flaen.

Ewch i https://www.south-wales.police.uk/cy-GB/cysylltu-a-ni/af/cysylltu-a-ni/us/cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/ gan ddyfynnu'r cyfeirnod 2200350471.