46 wedi eu harestio a gwerth amcangyfrifedig o £715,000 o gyffuriau wedi eu hatafaelu yn ystod yr wythnos ddiweddaraf i ddwysáu gwaith ar linellau cyffuriau

Mae swyddogion ledled de Cymru wedi arestio 46 o bobl a diogelu 24 o bobl sy'n agored i niwed yn ystod wythnos o weithredu wedi'i dargedu i darfu ar linellau cyffuriau. Llinellau cyffuriau yw'r enw a roddir ar y weithred o ddelio mewn cyffuriau lle mae grwpiau troseddau cyfundrefnol yn symud a chyflenwi cyffuriau o ddinasoedd i drefi llai ac ardaloedd gwledig fel rheol.

Mae'r gweithgaredd yn cael ei gynnal yn ystod “wythnos o ddwysáu” genedlaethol a gaiff ei harwain gan yr Asiantaeth Troseddu Cenedlaethol. Cynhaliwyd yr wythnos weithredu ddiweddaraf rhwng dydd Llun 3 Hydref a dydd Llun 10 Hydref.

Ymysg rhai o'r uchafbwyntiau ledled y tri heddlu (De Cymru, Gwent a Dyfed-Powys) mae:

• Arestio 46 o bobl
• Chwalu pum llinell cyffuriau
• Gweithredu 8 gwarant chwilio
• Atafaelu £34,710 o arian parod
• Atafaelu 7,020g o gocên [gyda gwerth stryd o £700,000]
• Atafaelu amrywiaeth o arfau gan gynnwys machetes, cyllyll, batiau pêl fas, dyrnau haearn ac arfau tanio ffug
• Nodi a diogelu 24 o blant ac oedolion sy'n agored i niwed
• Defnyddio cŵn cyffuriau goddefol mewn gorsafoedd trên yng Nghaerdydd, Casnewydd ac Abertawe mewn partneriaeth â'r Heddlu Trafnidiaeth Prydeinig
• Atafaelu 52 o ffonau symudol

Gwnaeth swyddogion ymgysylltu â phlant, rhieni a gweithwyr proffesiynol i dynnu sylw at y peryglon o gymryd rhan mewn gweithgareddau Llinellau Cyffuriau a chynnal sesiynau ymwybyddiaeth Llinellau Cyffuriau i dros 1,000 o bartneriaid amlasiantaeth a 11,000 o blant.

Dywedodd y Ditectif Arolygydd Richard Weber, cydlynydd yr wythnos o weithgarwch yn ne Cymru:

“Er ein bod yn gweithio drwy gydol y flwyddyn i waredu cyffuriau oddi ar y strydoedd, mae canlyniadau'r wythnos hon yn sylweddol. Drwy darfu ar linellau cyflenwi ac atal y rhai sy'n gysylltiedig rhag parhau i gyflenwi, gallwn wneud cymunedau de Cymru yn fwy diogel.

“Dim ond drwy gael cymorth a gwybodaeth gan breswylwyr y gallwn ni wneud hyn, felly rwy'n annog unrhyw un sydd â gwybodaeth am achosion o ddelio mewn cyffuriau yn eu cymuned i gysylltu â ni ar 101. Mae pob darn o wybodaeth yn bwysig.”