Ymchwiliad i lofruddiaeth yng Nghaewern: Enwi'r sawl a fu farw a chyhuddo dyn

Mae dyn 38 oed wedi cael ei gyhuddo o lofruddiaeth ar ôl i gorff gael ei ddarganfod yng Nghaewern, Castell-nedd ddydd Mercher, 27 Ebrill.

Mae Emmett Morrison, o Gaewern, wedi cael ei gyhuddo o lofruddio Timothy Dundon, 66 oed, ar Heol Catwg, ac mae'n cael ei gadw yn y ddalfa cyn ymddangos gerbron Llys Ynadon Abertawe ddydd Llun, 2 Mai.

Mae teulu Mr Dundon wedi cael y wybodaeth ddiweddaraf ac mae ei berthynas agosaf yn parhau i gael ei gefnogi gan swyddogion cyswllt â theuluoedd arbenigol.

Dywedodd yr Uwch-swyddog Ymchwilio, y Ditectif Uwch-arolygydd Darren George o Heddlu De Cymru:

“Yn amlwg, mae cyhuddo unigolyn o lofruddio Mr Dundon yn ddatblygiad sylweddol yn yr ymchwiliad, ond byddwn yn parhau i apelio ar unrhyw un sydd â gwybodaeth, ni waeth pa mor ddibwys ydyw yn eu barn nhw, i gysylltu â Heddlu De Cymru.
“Hoffwn ddiolch i'r gymuned leol am y cymorth y mae wedi ei roi i'r ymchwiliad hyd yma.
“Mae cynnydd wedi bod ym mhresenoldeb yr Heddlu yng Nghaewern ers dydd Mercher, a bydd hyn yn parhau dros y dyddiau nesaf wrth i ymholiadau fynd rhagddynt.”

Gofynnir i unrhyw un sydd â gwybodaeth gysylltu â Heddlu De Cymru gan ddyfynnu rhif digwyddiad *138869.

Ewch i:  https://bit.ly/SWPProvideInfo
Anfonwch neges breifat atom ar Facebook/Twitter
Drwy e-bost: [email protected]
Ffôn: 101