Canlyniadau cynllun peilot yr Ap Adnabod Wynebau newydd

Mae swyddogion yr heddlu yn ne Cymru wedi bod yn treialu’r Ap Adnabod Wynebau newydd, ac mae'r canlyniadau wedi bod yn gadarnhaol iawn. Dyma'r dechnoleg gyntaf o'i bath yn y DU i adnabod unigolion y mae'r heddlu yn awyddus i'w dal ar unwaith drwy ddefnyddio ap ar ffôn symudol.

Bydd yn galluogi swyddogion i gadarnhau manylion unigolyn dan amheuaeth y mae'r heddlu yn awyddus i'w ddal ar unwaith. Cafodd yr Ap Adnabod Wynebau ei dreialu gan 60 o swyddogion o Heddlu De Cymru sydd wedi cael hyfforddiant yn ystod cyfnod prawf 3 mis o hyd; profodd yn llwyddiannus iawn.

Beth oedd cynllun peilot yr Ap Adnabod Wynebau yn ei gynnwys?

Dangosodd cynllun peilot yr Ap y gall swyddogion ddwyn troseddwyr gerbron llys barn yn gyflymach, cadarnhau hunaniaeth pobl sy'n agored i niwed ac sydd angen cymorth gan yr heddlu ac asiantaethau partner eraill, a dod o hyd i bobl coll.

Dywedodd yr Arolygydd Andrew Hedley, Arweinydd Gweithredol ar gyfer Technoleg Adnabod Wynebau:

“Mae canlyniadau cadarnhaol y treial cychwynnol hwn yn galonogol. Mae'r Ap wedi profi sut y gall technoleg ddigidol helpu ein swyddogion i gadarnhau manylion unigolyn dan amheuaeth neu berson sy'n agored i niwed yn gyflym ac yn gywir, gan arbed amser gwerthfawr ein swyddogion.

Mae cynllun peilot yr Ap hefyd wedi dangos ei bwysigrwydd wrth ddiogelu pobl sy'n agored i niwed a nodi unigolion coll, gan eu galluogi i ganolbwyntio ar amddiffyn ein cymunedau.

Bydd y canlyniadau ac adborth gan y swyddogion a gymerodd ran yng nghynllun peilot yr Ap yn cael eu defnyddio i gynnal adolygiad pellach o'i nodweddion a'i effeithiolrwydd, a gwneud gwelliannau posibl.”

Canlyniadau cynllun peilot yr Ap Adnabod Wynebau

Defnyddiwyd yr Ap Adnabod Wynebau 42 o weithiau ar 35 o bobl. Fe'i defnyddiwyd yn llwyddiannus mewn ystod o sefyllfaoedd gwahanol i helpu swyddogion i adnabod unigolion yn effeithiol. Dyma rai enghreifftiau:

Defnyddiwyd yr Ap gan swyddogion i adnabod unigolyn a oedd wedi dwyn o siop ac wedi darparu manylion cyswllt ffug. Unwaith y daethpwyd o hyd i'r manylion cywir, cyfaddefodd yr unigolyn dan amheuaeth ei fod yn dweud celwydd wrth y swyddogion a chadarnhaodd ei fanylion cywir. Arestiwyd yr unigolyn dan amheuaeth am ddwyn a rhwystro'r heddlu.

Rhoddwyd gwybod gan heddlu arall bod person risg uchel, 15 oed ar goll. Roedd ganddo gysylltiadau blaenorol ag ardal de Cymru. O ganlyniad i'r wybodaeth hon, siaradodd swyddogion â bachgen roeddent yn credu ei fod yn cyfateb i'r disgrifiad a roddwyd o'r person coll. Pan wrthododd yr unigolyn rhoi ei fanylion, defnyddiwyd yr Ap i gymryd lluniau ohono a oedd yn cyfateb i'r person coll. Cafodd ei ddiogelu gan y swyddogion.

Galwyd swyddogion i adroddiadau o ddyn meddw ar stryd. Nid oedd yn gallu siarad â swyddogion ac nid oedd ganddo brawf adnabod. Defnyddiodd swyddogion yr Ap i gadarnhau pwy ydoedd a'i gyfeiriad. Aethpwyd ag ef i'w gartref a'i adael yng ngofal pobl briodol.

O ganlyniad i ddefnyddio'r Ap Adnabod Wynebau:

• Gwnaethpwyd 11 o arestiadau
• Daethpwyd o hyd i 4 person yr oedd yr heddlu chwilio amdanynt am droseddau.
• Defnyddiwyd mesurau diogelu mewn 5 achos.

Defnyddir technoleg adnabod wynebau pan mae'n angenrheidiol ac yn gymesur i wneud hynny. Mae'n ddatblygiad technolegol arall sy'n galluogi swyddogion yr heddlu i weithio mewn modd mwy effeithlon ac effeithiol ac i gadw unigolion a chymunedau yn ddiogel.