Llofruddiaeth Aamir Siddiqi: mae'r ymchwiliad i geisio dod o hyd i Mohammed Ali Ege yn parhau
Cynnwys y prif erthygl
Mae Heddlu De Cymru yn parhau i weithio gyda'r Asiantaeth Troseddu Cenedlaethol ac asiantaethau gorfodi'r gyfraith rhyngwladol i ddod o hyd i Mohammed Ali Ege a'i estraddodi i'r DU.
Maent yn chwilio amdano mewn cysylltiad â llofruddiaeth Aamir Siddiqi, 17 oed, a fu farw yn ei gartref yn Ninian Road, Y Rhath, ar 11 Ebrill 2010 ar ôl iddo ddioddef sawl clwyf trywanu.
Er bod dau ddyn wedi cael eu canfod yn euog o'i lofruddiaeth, mae Heddlu De Cymru yn parhau mor ymrwymedig ag erioed i ddod o hyd i Ege a'i arestio.
Gwnaeth Ege, sy'n 44 oed erbyn hyn, ffoi i India cyn i'r heddlu allu ei arestio mewn cysylltiad â llofruddiaeth Aamir. Cafodd ei arestio yn India yn 2013, ond yn 2017, wrth aros i gael ei estraddodi, gwnaeth ddianc o'r ddalfa yn India.
Yn dilyn ein hymchwiliad parhaus i ddod o hyd iddo, gwyddom ei fod wedi teithio.
Mae ei leoliad presennol yn dal i fod yn anhysbys ond, os a phryd y caiff Mohammed Ali Ege ei arestio unrhyw le yn y byd, mae trefniadau ar waith i sicrhau y bydd Heddlu De Cymru yn cael gwybod ar unwaith.
Dywedodd y Ditectif Arolygydd Stuart Wales, o Dîm Ymchwilio i Droseddau Mawr Heddlu De Cymru: “Roedd Aamir, heb os, yn ddyn ifanc llawn addewid a photensial.
“Efallai fod bron i 12 mlynedd wedi mynd heibio ers hynny, ond bydd hyn yn parhau i fod yn ymchwiliad byw â blaenoriaeth i Heddlu De Cymru nes y byddwn wedi dod o hyd i Mohammed Ali Ege ac wedi ei estraddodi i'r DU.
“Mae apeliadau niferus am wybodaeth mewn perthynas â Mohammed Ali Ege ar Interpol, y Porth Cyhoeddus Ymchwiliadau Mawr, Crimestoppers, gwefan Heddlu De Cymru a llawer o adroddiadau lleol, cenedlaethol a rhyngwladol yn y cyfryngau.
“Mae'n rhaid ei fod yn edrych dros ei ysgwydd yn barhaus, ac rydym mor benderfynol ag erioed i ddatrys y mater hwn.
“Gofynnwn i unrhyw un sydd â gwybodaeth am ei leoliad i gysylltu â ni – a hynny er mwyn teulu Aamir sydd wedi ymddwyn yn urddasol drwy'r cyfan.
“Rydym wedi rhoi'r wybodaeth ddiweddaraf i deulu Aamir, yr ydym yn parhau i'w cefnogi, ac maen nhw wedi parhau i ymddiried yn Heddlu De Cymru ac yn hyderus yn eu hymdrechion.
“Cânt eu cefnogi gan swyddog cyswllt teuluol ac rydym yn parhau i gyfathrebu â nhw yn unol â'u dymuniadau.”
Rydym yn annog unrhyw un sydd â gwybodaeth am leoliad Mohammed Ali Ege i gysylltu â ni drwy un o'r ffyrdd canlynol:
https://mipp.police.uk/operation/62SWP17A31-PO1
Ffoniwch Crimestoppers yn ddienw ar 0800 555 111
Anfonwch neges breifat atom ar Facebook/Twitter
E-bostiwch: [email protected]
Ffoniwch: 101 gan ddyfynnu cyfeirnod 1700150924