Heddlu De Cymru yn treialu dull newydd ar gyfer ymchwilio i achosion o drais rhywiol

Yn dilyn adolygiad trais rhywiol a gynhaliwyd ledled y DU, mae Heddlu De Cymru yn treialu dull newydd o ymchwilio i achosion o drais rhywiol, sy'n canolbwyntio ar hygrededd yr unigolyn dan amheuaeth yn hytrach na hygrededd achwynwyr.

Mae'r dull newydd, sef Ymgyrch Soteria, yn anelu at leihau'r tebygolrwydd y bydd unigolion yn aildroseddu ac at sicrhau bod ymchwiliadau yn fwy trylwyr ac effeithiol.

Dywedodd Ditectif Uwcharolygydd Ceri Hughes:

“Mae Ymgyrch Soteria yn ddull system gyfan, ar draws pob cenhedlaeth o ystyried y ffordd yr ymchwilir i achosion o drais rhywiol. Yn unol â Chynllun yr Heddlu a Throseddu*, mae dioddefwyr wrth wraidd y dull hwn, a cheir cyfranogiad academaidd sylweddol, yn ogystal â chyfranogiad gan bartneriaid statudol ac anstatudol.

"Mae gennym gyfle ardderchog, fel un o ddim ond pump heddlu yng Nghymru a Lloegr, i ddangos esiampl wrth wella arferion mewn perthynas ag ymchwilio i achosion o drais rhywiol. Bydd cymryd rhan yn yr ymgyrch yn ategu'r buddsoddiad sylweddol a wnaed gennym, gan sefydlu timau arbenigol ym mhob rhan o'r heddlu i ymchwilio i achosion o drais rhywiol, a phenodi 85 o dditectifs i ymwneud yn benodol ag ymchwilio i achosion o drais rhywiol."

Lansiwyd Ymgyrch Soteria yn ffurfiol gan yr heddlu ar 1 Tachwedd 2021. Mae'r cynllun peilot eisoes wedi gwneud y canlynol:

• Ymrwymo i sicrhau na fydd unrhyw un sy'n dioddef trais rhywiol heb ffôn symudol am fwy na 24 awr. Sicrhau y gall dioddefwyr trais rhywiol gael benthyg ffôn arall os bydd angen i'r heddlu gadw eu ffôn am fwy na 24 awr.
• Mwy o gapasiti yn y llysoedd er mwyn helpu i sicrhau y gall dioddefwyr gael cyfiawnder yn gyflym.
• Dechrau cynnig cyfarfodydd ymgyfarwyddo i bob dioddefwr trais rhywiol er mwyn rhoi cyfle i ddioddefwyr gyfarfod â'r Erlynydd ac, mewn achosion priodol, yr eiriolwr i drafod proses y llys a'r mesurau sydd ar gael i sicrhau eu bod yn darparu eu tystiolaeth orau (caiff y broses hon ei rhoi ar waith gan Wasanaeth Erlyn y Goron).

Dywedodd Dirprwy Gomisiynydd Heddlu a Throseddu De Cymru, Emma Wools:

"Mae'n hanfodol ein bod yn gweithredu ar y cyd â'n partneriaid i wella profiad dioddefwyr o'r system cyfiawnder troseddol a chreu achosion gwell a chryfach er mwyn sicrhau cynnydd yn nifer yr unigolion dan amheuaeth a gaiff eu cyhuddo.

"Mae gwaith paratoi yn mynd rhagddo, cyn cynnal ein harolygiad manwl o Ymgyrch Soteria ym mis Gorffennaf 2022, a bydd hyn yn arwain at nifer o argymhellion o ran sut y gallwn ddatblygu'r gwasanaeth a ddarperir gennym a'i wella.

"Drwy weithio gyda chydweithwyr yng Ngwasanaeth Erlyn y Goron, gallwn greu cynllun gweithredu ar y cyd a dangos ymhellach ein hymrwymiad parhaus gyda'n partneriaid i sicrhau bod dioddefwyr yn cael y gwasanaeth a'r canlyniad gorau posibl mewn perthynas â'r ymchwiliad."