Gwrthdrawiad angheuol ar yr A4119: Y dioddefwr wedi'i enwi

Mae dyn, 35 oed, a fu farw mewn gwrthdrawiad traffig ffyrdd yn ystod oriau mân bore dydd Sul ar yr A4119 wedi'i enwi fel Christopher Williams o Bentre.

Mae ei deulu wedi talu teyrnged iddo, gan ddweud:

“Roedd Chris yn dad ymroddedig ac yn fab, brawd, ewythr ac ŵyr y byddwn yn gweld ei eisiau yn fawr.

“Ei dair merch ifanc, Phoebe, saith oed, ac Emillie ac Esme, y ddwy'n bedair oed, oedd y peth pwysicaf yn ei fywyd.

“Roedd Chris yn frwdfrydig dros gerddoriaeth ac roedd wedi chwarae mewn sawl band yn y gorffennol, roedd yn mwynhau caraoce ac roedd yn dysgu ei ferch Phoebe i chwarae'r gitâr.

“Roedd Chris wedi cefnogi Dinas Abertawe ar hyd ei oes.

“Mae wedi cael ei ddisgrifio fel rhywun a fyddai'n gwneud unrhyw beth dros unrhyw un heb ofyn am gydnabyddiaeth.

“Bydd Chris yn aros yn ein calonnau ac ni fyddwn byth yn ei anghofio. Nid oes unrhyw eiriau i ddisgrifio'r golled y mae ein teulu yn ei theimlo ac yn delio â hi ar hyn o bryd. Mae wedi cael ei gymryd oddi wrthym yn llawer rhy gynnar.”

Mae swyddogion o Uned Ymchwiliadau Difrifol Heddlu De Cymru yn parhau â'u hymchwiliad i'r gwrthdrawiad a ddigwyddodd ar yr A4119 rhwng Coedelái a Thomastown, ychydig cyn 3am ddydd Sul 13 Chwefror.

Gall yr heddlu gadarnhau fod dyn 35 oed o ardal Caerdydd wedi'i arestio mewn cysylltiad â'r digwyddiad hwn. Mae bellach wedi cael ei ryddhau dan ymchwiliad.

Mae'r heddlu yn parhau i apelio am dystion a oedd yng nghyffiniau'r A4119 rhwng 2am a 3am a hoffai siarad ag unrhyw un a all fod wedi gweld tacsi VW Jetta du yn cael ei yrru yn yr ardal.

Mae'r heddlu hefyd yn apelio am i unrhyw un sydd â deunydd fideo CCTV neu gamera dashfwrdd a all fod wedi recordio'r digwyddiad gysylltu â Heddlu De Cymru gan ddyfynnu digwyddiad 2200050568.
Ewch i: https://bit.ly/SWPProvideInfo
Anfonwch neges breifat atom ar Facebook/Twitter
Drwy e-bost: [email protected]
Ffôn: 101