HDC yn mynd i'r afael â gyrru dan ddylanwad alcohol a chyffuriau

Bydd Heddlu De Cymru yn tynnu sylw at beryglon a chanlyniadau gyrru dan ddylanwad alcohol a chyffuriau drwy gefnogi ymgyrch genedlaethol Cyngor Cenedlaethol Prif Swyddogion yr Heddlu o heddiw [Dydd Llun 15 Awst] tan Ddydd Sul 28 Awst 2022.

Bydd yr ymgyrch yn cynnwys patrolau amlwg iawn, gweithgareddau ymgysylltu ac wythnos weithredu o dargedu gyrrwyr peryglus ac amddiffyn defnyddwyr ffyrdd rhag niwed.

Ledled Cymru y llynedd, roedd 11.7% o'r holl brofion anadl ar ochr ffordd naill ai'n brawf positif, wedi methu darparu neu wedi'u gwrthod, gyda 57.2% o'r profion cyffuriau yr un peth.

Dywedodd y Pennaeth Gweithrediadau Arbenigol, yr Uwch Arolygydd Marc Lamerton:“Mae gyrru dan ddylanwad alcohol neu gyffuriau yn hynod beryglus. Mae'n neges rydyn ni, fel swyddogion yr heddlu, yn ei rhannu o hyd ond yn anffodus, rydym yn parhau i weld damweiniau difrifol yn digwydd ac mae bywydau yn cael eu colli yn llawer rhy aml.

“Gall hyd yn oed yfed swm bach o alcohol effeithio eich gallu i yrru. Gall cyffuriau effeithio ar farn, golwg a gallu person i ganolbwyntio, sydd i gyd yn bethau hynod bwysig er mwyn gyrru, ac felly yn achosi i'r gyrrwr fod yn hynod beryglus ar y ffyrdd.

“Os ydych yn yfed alcohol neu'n cymryd cyffuriau anghyfreithlon/ar bresgripsiwn neu feddyginiaethau dros y cownter ac yna'n mynd y tu ôl i lyw y car, rydych yn peryglu eich bywyd chi, bywydau eich teithwyr ac eraill ar y ffyrdd. Mae gyrru dan ddylanwad alcohol a chyffuriau yn arwain at golli bywydau.”

Mae mynd i'r afael â gyrru dan ddylanwad alcohol a chyffuriau yn ymrwymiad parhaus i Heddluoedd ledled y DU.

Dylid rhoi gwybod am unrhyw bryderon am unigolyn yn gyrru dan ddylanwad.

Gellir gwneud hyn drwy roi gwybod ar-lein, ffonio 101 neu 999 os yw'n argyfwng.

Fel arall, gellir rhoi gwybod yn ddienw i Crimestoppers ar 0800 555 111 neu www.crimestoppers-uk.org