Ymchwiliad i lofruddiaeth ym Mharc Bute: Apêl ychwanegol i gysylltu â rhywun a allai fod yn dyst, delwedd newydd

Mae Heddlu De Cymru yn parhau i ymchwilio i farwolaeth Gary Jenkins, 54 oed, a fu farw yn Ysbyty Athrofaol Cymru ddydd Iau, 5 Awst ar ôl dioddef ymosodiad yn oriau mân y bore, ddydd Mawrth, 20 Gorffennaf ym Mharc Bute, Caerdydd.

Rydym yn apelio am help y cyhoedd i adnabod tyst posibl i'r digwyddiad.

 

Mae tri unigolyn wedi cael eu cyhuddo a'u cadw yn y ddalfa mewn perthynas â'r llofruddiaeth, ac nid yw ditectifs yn chwilio am unrhyw un arall mewn cysylltiad â'r ymosodiad ar hyn o bryd.

 

Ond, rydym yn apelio eto er mwyn adnabod dyn a allai fod â gwybodaeth a allai fod o ddefnydd i'r tîm ymchwilio.

 

Gwnaed yr apêl gyntaf i ddod o hyd i'r dyn anhysbys hwn fis diwethaf, ond mae ditectifs bellach yn gallu rhyddhau delwedd newydd a mwy clir ohono yn sgil ymholiadau pellach a wnaed drwy edrych ar CCTV.

 

Dywedodd yr Uwch-swyddog Ymchwilio, Ditectif Uwch-arolygydd Stuart Wales, o Dîm Ymchwilio i Droseddau Mawr Heddlu De Cymru: “Hoffwn ddiolch i'r gymuned am y cymorth rhagorol y mae wedi ei roi i'r ymchwiliad hyd yn hyn, sydd wedi bod yn ddefnyddiol iawn.

“Rydym bellach yn apelio eto i'r dyn yn y ddelwedd CCTV hon gysylltu â ni er mwyn i ni allu siarad ag ef am ei symudiadau a'i ryngweithio yng nghanol dinas Caerdydd yn ystod y cyfnod dan sylw.

“Credwn y byddai wedi bod yn ardal pen uchaf Stryd y Frenhines wrth ymyl ei chyffordd â Heol Sant Ioan tua 11.30pm ddydd Llun, 19 Gorffennaf.

“Rydym yn deall y bu gerllaw garej Esso ar waelod Heol y Gadeirlan am 11.54pm cyn cerdded i fyny Heol y Gadeirlan i ffwrdd o ganol y ddinas.

“Rhaid i mi bwysleisio nad yw'r dyn hwn wedi gwneud unrhyw beth o'i le, ond gallai fod â gwybodaeth bwysig a fyddai o ddefnydd pellach yn ein hymholiadau am yr hyn a ddigwyddodd i Dr Gary Jenkins.”

 

Gellir cyflwyno unrhyw wybodaeth neu ddeunydd fideo a allai helpu gyda'r ymchwiliad gan ddefnyddio'r porth ar-lein https://mipp.police.uk/operation/62SWP21B34-PO1
Fel arall, gallwch gysylltu â ni drwy un o'r ffyrdd canlynol, gan ddyfynnu rhif digwyddiad *254215.
Ewch i: https://bit.ly/SWPProvideInfo
Anfonwch neges breifat atom ar Facebook/Twitter
E-bostiwch: [email protected]
Ffoniwch: 101
Gallwch hefyd gyflwyno gwybodaeth i Taclo'r Tacle yn ddienw ar 0800 555 111.