Helynt Wentloog Avenue: Mwy o arestiadau

Mae swyddogion yr heddlu sy'n ymchwilio i helynt mawr a gafwyd yng Nghaerdydd ym mis Mawrth 2021 wedi arestio mwy na 30 o bobl ledled De Cymru ac ardaloedd eraill o'r DU bore heddiw.

Roedd Heddlu De Cymru a nifer o heddluoedd eraill yn rhan o'r ymgyrch i wneud yr arestiadau yn gynharach heddiw (22 Medi 2021).

Yng Nghaerdydd, mae 11 o bobl wedi cael eu harestio mewn cysylltiad â'r helynt, gan gynnwys saith dyn, tri bachgen yn eu harddegau ac un fenyw.
Cafodd 20 o bobl eraill eu harestio yn ardaloedd yr heddlu canlynol - Gwasanaeth yr Heddlu Metropolitanaidd (12), Heddlu Dyffryn Tafwys (4), Swydd Bedford (1), Swydd Hertford (1), Surrey (1) a Gwent (1).
Mae pawb a gafodd eu harestio yn y ddalfa o hyd.
Cafodd swyddogion yr heddlu eu galw i Shirenewton ar Wentloog Avenue, Trowbridge, Caerdydd ychydig ar ôl 4pm ddydd Sul, 21 Mawrth 2021.

Cafodd pedwar dyn eu hanafu yn ystod yr helynt.
Atafaelwyd nifer o arfau ar y pryd, a chafodd nifer o unigolion eu harestio yn fuan wedi hynny.

Parhaodd ein hymholiadau, gan arwain at yr ymgyrch a welwyd heddiw.

Dywedodd y Ditectif Uwch-arolygydd Ceri Hughes o Heddlu De Cymru: “Mae'r gwaith gorfodi a wnaed heddiw yn dilyn ymchwiliad cymhleth chwe mis o hyd a gynhaliwyd gan dîm o dditectifs Heddlu De Cymru, gyda chymorth gan nifer o heddluoedd eraill.
“Ym mis Mawrth, gwnaethom addo y byddem yn dod o hyd i'r bobl a oedd yn gyfrifol am yr anhrefn sylweddol hwn, ac mae'n bleser gennyf ddweud, gyda chymorth heddluoedd eraill, fod nifer sylweddol o bobl wedi cael eu harestio.
“Rydym yn credu bod yr unigolion a arestiwyd yn gysylltiedig â'r anhrefn difrifol ar Safle Sipsiwn a Theithwyr Shirenewton ar 21 Mawrth eleni.

“Fel bob amser, mae Heddlu De Cymru yn ymdrechu i amddiffyn pob cymuned rhag niwed difrifol.

“Bydd mwy o heddlu i'w gweld yn ardal Wentloog Avenue heddiw, ac yn ystod y diwrnodau nesaf, er mwyn rhoi tawelwch meddwl.

“Dylai unrhyw un sy'n meddwl bod rhyddid ganddo i gyflawni trais o'r fath yn ardal Heddlu De Cymru feddwl ddwywaith. Ni chaiff ei oddef ac rydym yn gobeithio bod yr ymgyrch ar y cyd gan wahanol heddluoedd a welwyd heddiw yn cyfleu hynny'n glir.

“Hoffwn ddiolch i gymunedau lleol unwaith eto am eu hamynedd, eu dealltwriaeth a'u cydweithrediad wrth i'r arestiadau a'r chwiliadau fynd rhagddynt.”

Mae chwiliadau yn parhau a rhagwelir y bydd mwy o bobl yn cael eu harestio.

Gofynnir i dystion neu unrhyw un sydd â gwybodaeth sy'n ymwneud â'r hyn a ddigwyddodd ar 21 Mawrth, gan gynnwys deunydd fideo a deunydd camera dashfwrdd, gysylltu â Heddlu De Cymru gan ddyfynnu rhif digwyddiad *098726.
Ewch i: https://bit.ly/SWPProvideInfo
Anfonwch neges breifat atom drwy Facebook/Twitter
Drwy e-bost: [email protected]
Ffoniwch: 101 neu'n ddienw drwy Taclo'r Tacle ar 101 555 111.