Bwrgleriaeth drwy dynnu sylw yn y Barri: Apêl teledu cylch cyfyng

Mae Heddlu De Cymru'n ymchwilio i fwrgleriaeth drwy dynnu sylw yng nghartref gŵr oedrannus yn y Barri.

Cnociodd y dau ddyn a amheuir, a oedd yn honni eu bod yn gweithio i'r bwrdd dŵr, ar ddrws y gŵr yn Barrians Way am oddeutu 5pm ddydd Sul, 26 Medi.

Gwnaethant ofyn am gael edrych ar ei gyflenwad dŵr ond ar ôl mynd i mewn, gwnaethant ei wthio i'r soffa a dwyn arian, tybaco a ffôn symudol oddi wrtho.

Diolch byth, ni chafodd y dioddefwr 80 oed ei anafu ac er bod y digwyddiad wedi'i ysgwyd, mae wedi dweud wrth y swyddogion ei fod yn teimlo'n ddiogel.

Mae'n cael cymorth llawn gan y swyddogion i gynnal ymholiadau i geisio adnabod ac arestio'r rhai sy'n gyfrifol.

 

Disgrifiwyd y dynion a amheuir fel gwyn, yn eu 30au neu 40au, gydag acenion lleol ac yn gwisgo masgiau wyneb.

Roedd gan un ohonynt fwstas, roedd yn gwisgo het felen galed a chôt waith.

Roedd y dyn arall, a oedd yn fwy byrdew na'r cyntaf, yn gwisgo top melyn a het galed.

 Mae hwn yn ddigwyddiad unigol ond byddem yn annog unrhyw un sydd â pherthnasau oedrannus neu'r rhai sy'n gofalu am bobl hŷn i'w gwneud nhw'n ymwybodol o'r digwyddiad hwn.

Mae lladron tynnu sylw yn esgus bod yn rhywun arall er mwyn cael mynediad i'ch cartref.

Mae nifer o bethau y gallwch chi eu gwneud i atal bwrgleriaeth drwy dynnu sylw.

• Cofiwch "os nad ydych yn siŵr, cadw nhw allan"
• Defnyddiwch y twll sbïo i weld pwy sydd yno
• Os byddwch yn agor y drws, gosodwch y gadwyn gyntaf
• Gofynnwch am brawf adnabod bob tro a'i gadarnhau gyda'r cwmni cyn gadael unrhyw un i mewn i'ch cartref
• Defnyddiwch y rhif ffôn sydd wedi'i hysbysebu yn y llyfr ffôn neu ar-lein oherwydd gallai'r rhif ar eu cerdyn adnabod fod yn ffug. Ffoniwch adran gwasanaeth cwsmeriaid y cwmni cyfleustodau. Caewch y drws pan fyddwch yn gwneud hyn.
• Cofiwch na fydd ymwelwyr dilys yn poeni eich bod yn gwneud hyn.
• Os na fyddwch yn teimlo'n siŵr, trefnwch amser i'r galwr ddychwelyd pan fydd ffrind neu berthynas yno.
• Mae modd trefnu cynllun cyfrinair ar gyfer apwyntiadau wedi'u trefnu ymlaen llaw gyda chwmnïau cyfleustodau

 

Os teimlwch dan fygythiad neu mewn perygl oherwydd presenoldeb y galwr, ffoniwch 999.

Gofynnir i unrhyw un sydd â gwybodaeth am y digwyddiad hwn gysylltu â Heddlu De Cymru gan ddyfynnu rhif digwyddiad *339779.

Ewch i: https://www.south-wales.police.uk/cy-GB/cysylltu-a-ni/af/cysylltu-a-ni/us/cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/

Anfonwch neges breifat atom drwy Facebook/Twitter
Drwy e-bost: [email protected]