Swyddog plismona'r ffyrdd yn ennill gwobr genedlaethol am gyswllt teuluol

Mae un o swyddogion Heddlu De Cymru wedi ennill gwobr genedlaethol fawreddog o'r elusen diogelwch ar y ffyrdd Brake am ei waith fel swyddog cyswllt teuluol, ar ôl cael ei enwebu gan aelodau'r teulu yr oedd yn eu cefnogi.

Cafodd y Rhingyll Darren Westall, o Uned Plismona'r Ffyrdd yr heddlu, ei enwebu gan deulu Ryan Hamer, a oedd yn 20 oed, a fu farw yn dilyn gwrthdrawiad car yr oedd yn teithio ynddo ym mis Ebrill 2019.

Mae mam Ryan, Cerys, a'i frawd, Mitch, wedi siarad am eu profiad ac annog gyrwyr i yrru'n ofalus ar y ffyrdd.

Maent hefyd wedi canmol y Rhingyll Westall, eu swyddog cyswllt teuluol, am y cymorth a roddodd iddynt yn ystod y broses gyfreithiol ddilynol.

Dywedodd Brake fod aelodau'r teulu wedi canmol ymdrechion diflino’r Rhingyll Westall i sicrhau eu bod yn cael y wybodaeth yr oedd eu hangen arnynt, a diolch iddo am fod yn ffynhonnell werthfawr o gysur yn ystod y cwest a'r achos llys.

Cyhoeddodd Brake enillwyr gwobrau eleni mewn seremoni ar-lein ddydd Mercher.

Dywedodd yr Uwch-arolygydd Jason James, pennaeth ymgyrchoedd arbenigol yn Heddlu De Cymru:

“Mae gan swyddogion cyswllt teuluol rôl hynod bwysig a gallant fod yn gymorth mawr i deulu sy'n dod i delerau â'r hyn sy'n aml yn amgylchiadau hynod anodd. Rwy'n gwybod faint mae'r teuluoedd hynny yn gwerthfawrogi'r empathi a'r cymorth y maent yn eu dangos.
“Yn yr achos hwn, mae'n amlwg bod y cymorth a roddwyd i deulu Ryan gan Darren wedi cael ei werthfawrogi'n fawr iawn. Mae'n hael iawn i deulu Ryan enwebu Darren ar gyfer y wobr hon, ac rwy'n ddiolchgar iddynt am wneud hynny, ac i Darren am y tosturi mae wedi'i ddangos.
“Rwy'n meddwl am aelodau teulu Ryan ac yn cydymdeimlo â nhw, ac rwyf wir yn gobeithio y bydd eu dewrder wrth siarad allan yn annog unrhyw yrwyr i sicrhau eu bod yn gyrru'n ddiogel.”

Dywedodd Tracey Lister, pennaeth Gwasanaeth Cenedlaethol i Ddioddefwyr Ffyrdd yr elusen Brake:

“Mae pawb a gafodd eu henwebu ar gyfer Gwobrau Swyddog Cyswllt Teuluol Brake 2021 yn haeddu canmoliaeth enfawr, a diolch iddynt am eu gwaith dros y flwyddyn ddiwethaf mewn amgylchiadau hynod o heriol. Mae'r tri enillydd i gyd wedi dangos gofal ac ymrwymiad rhagorol wrth helpu teuluoedd mewn profedigaeth ac rydym yn ddiolchgar am bopeth maent wedi'i wneud.”

Dywedodd y Rhingyll Tim MacAleenan, Arweinydd Cyswllt Teuluol Plismona'r Ffyrdd Cenedlaethol:

“Gall fod yn swyddog cyswllt teuluol fod yn un o'r rolau mwyaf heriol yng ngwasanaeth yr heddlu, ac mae'n rôl wirfoddol o ganlyniad i'r galw y mae'n ei roi ar unigolion.”