Mynd i'r Afael â Thrais yn erbyn Menywod a Merched – Datganiad gan ACC Jenny Gilmer

Mae mynd i'r afael â thrais a chamdriniaeth yn erbyn menywod a merched wedi bod yn flaenoriaeth i Heddlu De Cymru ers tro, ac rydym yn cydnabod bod mwy o bryder nag erioed ynghylch diogelwch personol a thrais.

Fel heddlu, mae gennym record ardderchog o weithio mewn partneriaeth. Rydym yn targedu adnoddau er mwyn sicrhau llwybrau clir i ddiogelwch ar gyfer dioddefwyr, cefnogi a grymuso goroeswyr a buddsoddi mewn ymyriadau seiliedig ar dystiolaeth sy'n mynd i'r afael ag achosion sylfaenol, gan ymdrin â'r agweddau a'r ymddygiadau niweidiol sy'n arwain at drais a chamdriniaeth.

Mae gennym hefyd strategaethau ehangach sy'n delio â mathau eraill o gam-drin, gan gynnwys cam-drin domestig sy'n effeithio ar ddynion, a'n dull ni o weithredu yw trin pob achos o drais yn unigol, wrth hefyd ganolbwyntio ar gyffredinrwydd a bygythiad, risg a niwed.

Rydym yn cydnabod y gall unrhyw un fod yn ddioddefwr a byddwn yn ymateb i bob dioddefwr sy'n rhoi gwybod am ddigwyddiadau inni. Ymdrinnir â phob dioddefwr mewn modd sensitif a pharchus. Byddwn yn parhau i ddatblygu ymatebion er mwyn diwallu anghenion dioddefwyr, a byddwn yn canolbwyntio'n benodol ar ymyriadau ar gyfer menywod yr ydym ni'n gwybod eu bod yn fwy tebygol o fod yn ddioddefwyr, o ran amlder a difrifoldeb y trais a chamdriniaeth.

Rydym yn deall bod digwyddiadau diweddar wedi cynyddu ofn trosedd, yn benodol mewn canol trefi a dinasoedd liw nos, ac mae pryderon am faterion megis trais rhywiol a sbeicio diodydd.

Mae rhai o'r mentrau sydd gennym ar waith yma yn ne Cymru yn cael eu hystyried yn arfer orau ac maent wedi cael eu mabwysiadu gan heddluoedd eraill.

Rydym yn ymwneud â mentrau megis y Bws Diogelwch i Fyfyrwyr yng Nghaerdydd a'r Man Cymorth yn Abertawe, ac rydym yn gweithio gyda staff drws ac yn eu hyfforddi i adnabod pobl sy'n agored i niwed. Nod patrolau amlwg iawn yw atal trosedd ac ymddygiad gwrthgymdeithasol a defnyddir amrywiaeth o fesurau eraill hefyd er mwyn adnabod a diogelu pobl sy'n agored i niwed. Rydym yn gweld enghreifftiau cyson lle mae'r mentrau a'r mesurau hyn wedi talu ar eu canfed.

Bydd Heddlu De Cymru yn parhau i wneud popeth o fewn ei allu i gadw cymunedau'n ddiogel a sicrhau bod pobl yn teimlo'n ddiogel wrth iddynt fyw eu bywydau pob dydd.

Rydym yn annog pobl i gysylltu â ni er mwyn rhoi gwybod am unrhyw ddigwyddiadau Cysylltu â ni | Heddlu De Cymru (https://www.south-wales.police.uk/cy-GB/cysylltu-a-ni/af/cysylltu-a-ni/)

Fel rhan o strategaeth Llywodraeth y DU i fynd i'r afael â thrais yn erbyn menywod a merched, rydym yn treialu adnodd ar-lein newydd o'r enw StreetSafe sy'n galluogi pobl i nodi lleoliadau lle y maent wedi teimlo'n anniogel a nodi pam eu bod wedi teimlo'n anniogel yn y lleoliad hwnnw: https://www.police.uk/streetsafe