Diweddariad ar yr Ymchwiliad i Lofruddiaeth yn Llanilltud Faerdref

Mae ditectifs sy’n ymchwilio i lofruddiaeth menyw yn Llanilltud Faerdref wedi arestio dyn ac mae yn y ddalfa ar hyn o bryd.

Nid yw’r ddioddefwraig wedi’i hadnabod yn ffurfiol eto, ond mae swyddogion yn credu mai’r preswylydd lleol 65 oed, June Fox-Roberts, ydyw.

Gellir cadarnhau hefyd mai yng nghyfeiriad ei chartref yn St Anne’s Drive y cafodd y corff ei ddarganfod ddydd Sul. Aeth swyddogion i’r cyfeiriad ar ôl i aelod pryderus o’r teulu gysylltu â nhw.

Mae teulu June, sy’n cael ei gefnogi gan swyddogion wedi’u hyfforddi’n arbennig ar hyn o bryd, wedi talu’r deyrnged ganlynol iddi:

“Rydym mewn sioc lwyr am farwolaeth ein mam. Ni fydd ei llofruddiaeth fyth yn gwneud synnwyr i ni. Roedd hi’n fenyw gynnes, hael ac ar ben ei digon pan oedd ei theulu a’i ffrindiau o’i chwmpas.

“Roedd hi’n caru ei theulu’n fawr ac ni fydd pethau byth yr un peth i ni. Mae ein calonnau wedi’u torri.Gofynnwn i chi barchu ein preifatrwydd a gadael i ni alaru a dod i delerau â’r hyn sydd wedi digwydd.”

Mae tâp ynysu’r heddlu o amgylch y tŷ a’r tir cyfagos o hyd. Mae mwy o waith patrolio’n mynd rhagddo ac mae swyddogion yn parhau i gynnal ymholiadau o ddrws i ddrws ac i fynd ar dywydd pob darn o wybodaeth gan y cyhoedd.

Dywedodd y Ditectif Uwch-arolygydd Darren George:

“Mae fy meddyliau gydag aelodau o deulu June yn ystod y cyfnod ofnadwy hwn – mae gennym swyddogion wedi’u hyfforddi’n arbennig yn eu cefnogi.

“Hoffwn ddiolch i’r rheini sydd wedi ymateb i’n hapêl. Mae’r arestiad heddiw yn ddatblygiad sylweddol ond hoffwn bwysleisio mai ymchwiliad parhaus yw hwn ac rwy’n annog unrhyw un sydd â gwybodaeth ac nad yw wedi ei chyflwyno i ni eto i wneud hynny, ni waeth pa mor ddibwys y gallai’r wybodaeth ymddangos.

“Mae’r llofruddiaeth hon wedi rhoi sioc i bawb yn y pentref a’r ardaloedd o’i amgylch, a hynny’n ddealladwy. Rydym wedi cynyddu nifer y swyddogion sydd i’w gweld yn y pentref ac rwy’n gobeithio y bydd hyn yn rhoi sicrwydd i’r gymuned. Bydd ein presenoldeb yn parhau wrth i’r ymchwiliad fynd rhagddo.”

Gellir cyflwyno gwybodaeth neu ffilm a allai gynorthwyo’r ymchwiliad drwy borth ar-lein: https://mipp.police.uk/operation/62SWP21B41-PO1

Fel arall, gall pobl gysylltu â ni drwy un o’r ffyrdd canlynol, gan ddyfynnu rhif digwyddiad 2100408848:

Ewch i: https://bit.ly/SWPProvideInfo

Anfonwch neges breifat atom ar Facebook/Twitter

Drwy e-bost: [email protected]

Ffôn: 101

Gellir hefyd roi gwybodaeth yn ddienw i Taclo'r Tacle drwy ffonio 0800 555 111.