Chun Xu yn cael ei ganfod yn euog o lofruddio ac ymgais i lofruddio

Mae Chun Xu wedi ei ganfod yn euog o lofruddio Wenjing Lin, merch 16 oed, a cheisio llofruddio ei llystad, Yongquan Jiang.

Mae Chun Xu wedi ei ganfod yn euog o lofruddio Wenjing Lin, merch 16 oed, a cheisio llofruddio ei llystad, Yongquan Jiang.

Cafodd y dyn 32 oed, a oedd yn byw ym Merthyr Tudful, ei ganfod yn euog yn Llys y Goron Merthyr Tudful ddydd Mawrth, 9 Tachwedd (2021)

Cafodd y troseddau eu cyflawni yn y Blue Sky Takeaway ar Stryd Baglan, Treorci ddydd Gwener, 5 Mawrth 2021.

Roedd Xu wedi ymweld â theulu'r dioddefwr ar 4 Mawrth a threulio'r noson gyda nhw. Clywodd y llys fod Xu yn ceisio dial am ddyled arian yr oedd arno i'r teulu. Roedd wedi gamblo arian a roddwyd iddo gan fam Wenjing Lin yr oedd i fod i anfon adref at gyfaill cyffredin yn Tsieina.

Y diwrnod canlynol, ar 5 Mawrth, llofruddiodd Wenjing drwy ei thagu a'i gadael yn gorwedd ar y llawr ger cownter y siop.

Yna, denodd ei llystad i'r islawr lle y trywanodd ef sawl gwaith â dwy gyllell cyn trywanu ei hun.

Profodd ymchwiliad Heddlu De Cymru fod gweithredoedd Xu yn rhagfwriadol pan atafaelwyd ei ffôn. Ar y ffôn, gwelwyd ei fod wedi defnyddio peiriannau chwilio ar y rhyngrwyd i ddarganfod a fyddai tân yn dinistrio olion bysedd ychydig oriau cyn yr ymosodiadau. Clywodd y llys hefyd fod Xu wedi mynd â chyllell gydag ef i'r safle.

Roedd Chun Xu wedi pledio'n ddieuog i lofruddio, ymgais i lofruddio a chlwyfo'n fwriadol, ond plediodd yn euog i ddynladdiad a chlwyfo anghyfreithlon.

Ond, cafodd ei gyhuddo o lofruddio ac ymgais i lofruddio gan Wasanaeth Erlyn y Goron.

Cafodd y rheithgor ef yn euog o bob cyhuddiad yn unfrydol, ac ar ôl hynny dywedodd y barnwr wrth y diffynnydd ei fod yn wynebu carchar am oes pan gaiff ei ddedfrydu ddydd Gwener (12 Tachwedd).

Dywedodd y Ditectif Brif Arolygydd Mark Lewis, yr Uwch Swyddog Ymchwilio:

“Ar ran Heddlu De Cymru, rwy'n falch bod y treial wedi arwain at sicrhau euogfarn lwyddiannus yn achos Chun Xu, a hynny am lofruddio Wenjing ac am ymgais i lofruddio Yongquan Jiang. Dangosodd y dystiolaeth a gasglwyd ac a glywyd yn yr achos hwn fod hon yn llofruddiaeth ragfwriadol a didrugaredd o ferch 16 oed ddiniwed, clyfar, talentog a phoblogaidd, ac ymosodiad difrifol ar ei llystad gydag ymgais amlwg i'w ladd.

“Yn ystod ein hymchwiliad, daeth yn amlwg pa mor boblogaidd oedd Wenjing ymhlith pawb a oedd yn ei hadnabod. Achosodd y digwyddiad hwn syndod yng nghymunedau agos Treorci a Threherbert ac mae wedi bod yn ddinistriol i deulu a ffrindiau Wenjing.

Rwy'n meddwl yn bennaf heddiw am fam Wenjing sydd wedi colli ei merch gariadus, ac rwy'n gwybod mai hi oedd ei ffrind agosaf hefyd. Gobeithio y bydd yr euogfarn hon yn helpu mewn rhyw ffordd, ond rwyf hefyd yn gwybod y bydd y dyddiau, misoedd a'r blynyddoedd i ddod yn hynod o anodd.

“Hoffwn ddiolch i'r gymuned am ei chefnogaeth a'i chymorth, ar adeg y digwyddiad ac yn ystod yr ymchwiliad dilynol. Hoffwn hefyd dalu teyrnged i ddiwydrwydd Gwasanaeth Erlyn y Goron a'r Cwnsleriaid, a'r swyddogion a'r staff yn fy nhîm ymchwilio am y proffesiynoldeb rhagorol a'r dycnwch a ddangoswyd i gael cyfiawnder yn yr achos hwn."

Wenjing Lin.