Gwrthdrawiad traffig ffyrdd angheuol ar y B4287: Enwi dioddefwr

Mae'r dyn 22 oed a fu farw yn dilyn gwrthdrawiad traffig ffyrdd angheuol ddydd Sadwrn 30 Hydref wedi cael ei enwi fel Christopher Howells o Gimla, Castell-nedd.

Mae rhieni Mr Howells wedi talu teyrnged iddo, gan ddweud:

“Yn anffodus, ar 30 Hydref 2021, bu farw ein mab, brawd, wncwl a ffrind annwyl Christopher Howells. Roedd yn unigryw, yn llawn bywyd a hwyl. Bydd sawl un yn gweld ei eisiau'n fawr ac mae wedi gadael bwlch enfawr yng nghalonnau pawb.

“Gwnaeth fwynhau ei ddiwrnodau cynnar yn gweithio yn McDonald's yn Sgiwen, ac yna aeth ati i gyflawni ei uchelgais fel prentis cyrff ceir ac roedd yn gwneud yn dda iawn. Roedd ei holl gydweithwyr yn McDonald's a H.J. Phillips yn falch iawn ohono ac, fel y gweddill ohonom, ni allent gredu ei fod wedi marw mor sydyn.

“Ni allwn ddisgrifio’r golled y mae ein teulu yn ei theimlo ar hyn o bryd.

“Byddwn bob amser yn dy garu ac yn gweld dy eisiau.”

Ychwanegodd Callum, ffrind Chris:

“Chris oedd fy ffrind gorau am dros saith mlynedd. Gwnaethom gwrdd yn y coleg yn gyntaf a daethom yn ffrindiau hirdymor ac agos iawn, i'r fath raddau roeddem yn teimlo fel brodyr.

“Roedd bob amser yn berson cyfeillgar a chynnes i dreulio amser ag ef. Gwnaethom dreulio bron bob dydd gyda'n gilydd a byddaf yn gwerthfawrogi pob eiliad y gwnaethom ei rannu â'n gilydd. Byddaf yn gweld dy eisiau am byth a bydd bwlch mawr yn fy nghalon am byth. Cariad, Callum.”

Mae'r uned ymchwilio i wrthdrawiadau difrifol yn Heddlu De Cymru yn parhau i apelio am wybodaeth yn dilyn y gwrthdrawiad a ddigwyddodd ar y B4287 yn Efail Fach, Pontrhydyfen tua 7.30pm ddydd Sadwrn 30 Hydref 2021.

Roedd dau gerbyd yn y gwrthdrawiad, Mazda MX-5 gwyrdd a Ford Fiesta coch, a oedd yn teithio i gyfeiriadau croes.

Bu'r ffordd ar gau am sawl awr er mwyn cynnal ymchwiliadau ar y safle.

Mae swyddogion yn apelio ar unrhyw un sydd â gwybodaeth, a allai fod wedi bod yn teithio ar hyd y ffordd honno ac wedi sylwi ar arddull gyrru'r naill gerbyd neu'r llall yn ystod y cyfnod cyn y gwrthdrawiad, neu y gallai fod ganddynt ddeunydd fideo o gamera dashfwrdd, i gysylltu drwy un o'r dulliau canlynol:

• https://bit.ly/3sfyqR6
• Anfonwch neges breifat atom drwy Facebook/Twitter
• E-bostiwch: [email protected]
• Ffoniwch: 101

Rhowch y cyfeirnod *380974.