Cyhuddo pump o bobl yn dilyn ymgyrch cyffuriau

Mae pump o bobl wedi cael eu cyhuddo o droseddau sy'n ymwneud â chyffuriau fel rhan o ymgyrch gan Uned Cudd-wybodaeth a Throseddau Cyfundrefnol Heddlu De Cymru.

Drwy gydol yr wythnos hon, gweithredodd swyddogion nifer o warantau a gynlluniwyd ymlaen llaw yn ardal Pen-y-bont ar Ogwr, Port Talbot, Swydd Gaerhirfryn a Swydd Rydychen fel rhan o Ymgyrch Wizard.

Arestiwyd pump o bobl, yn ychwanegol at ddau unigolyn sydd eisoes wedi cael eu cyhuddo o droseddau sy'n ymwneud â chyffuriau fel rhan o'r ymgyrch bresennol.

Mae'r unigolion canlynol bellach wedi'u cyhuddo o droseddau sy'n ymwneud â chyffuriau:

Cam 1 – Awst 2021

• Shane White, 33 oed, o ardal Port Talbot 
• Daniel Baker, 29, o ardal Sandfields

Cam 2 – Tachwedd 2021

• Steven Hughes, 46, o Abercynon
• Steven Semmens, 38, o Daibach
• Luke Thomas, 21, o Ogledd Corneli

Yn ystod y trydydd cam o'r ymgyrch, arestiwyd dyn 41 oed o Rydychen a dyn 42 oed o Swydd Gaerhirfryn ac maent yn y ddalfa ar hyn o bryd.

Mae'r pump wedi cael eu cyhuddo o amrywiol droseddau, gan gynnwys cynllwynio i gyflenwi cyffuriau dosbarth A.

Dywedodd y Ditectif Arolygydd Russell Jenkins:

“Mae Ymgyrch Wizard wedi bod yn llwyddiannus iawn hyd yma, ar ôl i swyddogion atafaelu cyffuriau, arian parod ac eiddo yn ystod y cam gorfodi.

“Yn ystod y camau gorfodi, cafwyd hyd i £49,000 mewn arian parod, sawl dyfais symudol sydd wedi bod yn allweddol i'r ymchwiliad, taser wedi'i guddio fel torsh ynghyd â chetamin a chanabis fel rhan o'r ymgyrch.

"Nid oes lle i gyffuriau anghyfreithlon yn ein cymdeithas, a byddwn yn parhau i gydweithio i dargedu'r rhai hynny y mae eu gweithgareddau troseddol yn amharu ar fywydau cymunedau de Cymru.

“Rydym yn ymrwymedig i darfu ar grwpiau troseddu cyfundrefnol a'u chwalu, gan ddod â phobl gerbron y llys a chael gwared ar gyffuriau o'n strydoedd."

Dylai unrhyw un sydd â gwybodaeth am achosion o gyflenwi cyffuriau yn y gymuned ffonio'r heddlu ar 101 neu Crimestoppers, yn ddienw, ar 0800 555111.  Mewn argyfwng, ffoniwch 999.