Ymgyrch wedi'i lansio i gadw ardaloedd arfordirol Caerdydd a Bro Morgannwg yn ddiogel.

Bydd Ymgyrch Elstree yn cynnwys mwy o batrolau a, lle y bo'n briodol, bwerau gwasgaru mewn lleoliadau allweddol, gan gynnwys Bae Caerdydd, Penarth ac Ynys y Barri, yn ogystal â'r Arfordir Treftadaeth rhwng Trwyn y Rhws ac Aberogwr.

Bydd yr ymgyrch ar waith yn ystod misoedd y gwanwyn a'r haf.

Caiff swyddogion yn y gymdogaeth leol eu cefnogi gan gydweithwyr ym mhob rhan o Heddlu De Cymru, gan gynnwys Swyddogion Cymorth Cymunedol yr Heddlu, Swyddogion ymateb, Gwasanaethau Cymorth Gweithredol a'r Gwnstabliaeth Wirfoddol, ynghyd ag amrywiaeth o gydweithwyr o'n hasiantaethau partner.

Byddant yn gweithio fel tîm i atal troseddau ac ymddygiad gwrthgymdeithasol, gan sicrhau y gall preswylwyr ac ymwelwyr sy'n dilyn y gyfraith fwynhau'r ardaloedd arfordirol hyn mewn heddwch.

Yn ystod penwythnos cyntaf #OpElstree, gorchmynnwyd pedwar dyn meddw o Bont-y-pŵl i adael Aberogwr oherwydd eu hymddygiad gwrthgymdeithasol, a byddant yn cael llythyr rhybuddio Ymddygiad Gwrthgymdeithasol cam 1.

Yn ystod yr ail benwythnos – penwythnos Gŵyl y Banc – ymatebodd swyddogion i adroddiadau am grŵp o bobl ifanc yn ymddwyn mewn ffordd afreolus wrth symud rhwng The Knap a Pharc Romilly yn y Barri.

Atafaelwyd alcohol a chynhaliwyd sawl achos o stopio a chwilio ymhlith y grŵp o 60 o bobl ifanc, ac anfonwyd nifer o lythyrau rhybuddio Ymddygiad Gwrthgymdeithasol cam 1 o ganlyniad.

Ar ôl i'r bobl ifanc wasgaru, cynhaliodd y swyddogion chwiliad cyflym o Barc Romilly a daethpwyd hyd i fagiau o bowdr gwyn, yr amheuir eu bod yn gyffuriau Dosbarth A, wedi'u cuddio mewn llwyn.

Gerllaw, arestiwyd dyn am ddwyn ffôn symudol oddi wrth fachgen 14 oed ar y Stryd Fawr. Defnyddiodd swyddogion #OpElstree ap olrhain i ddod o hyd i'r iPhone a gafodd ei ddwyn oddi wrth y bachgen. Cyhuddwyd Joshua Smith, 20 oed, o'r Barri o ddwyn a bydd yn ymddangos gerbron Llys Ynadon Caerdydd ar 20 Mai.

Ym Mhenarth, Aberogwr ac Ynys y Barri, lle parhaodd patrolau amlwg iawn dros benwythnos Gŵyl y Banc, roedd mwy o newyddion da – sef na chafwyd unrhyw achosion o ymddygiad gwrthgymdeithasol nac anhrefn.

Dywedodd y Prif Arolygydd Bella Rees:

"Mae'r mwyafrif helaeth o bobl sy'n ymweld â'n hardaloedd arfordirol hyfryd yn ymddwyn yn briodol ac yn unol â'r rheoliadau.

"Ond ni fyddwn yn goddef ymddygiad y nifer bach o bobl sy'n yfed gormod o alcohol, yn taflu sbwriel ac yn amharu ar allu dinasyddion sy'n parchu'r gyfraith i fwynhau eu hunain mewn heddwch.

"Mae ymddygiad gwrthgymdeithasol a throseddu yn cael effaith niweidiol ar ein cymunedau, a byddwn yn parhau i fynd ar batrôl mewn ardaloedd allweddol er mwyn atal hynny."

Gellir rhoi sicrwydd i'r sawl a fydd yn ymweld â'r ardaloedd arfordirol hyn dros yr wythnosau a'r misoedd nesaf y bydd pwerau gwasgaru Adran 35 ar waith i atal ymddygiad gwrthgymdeithasol, lle bo hynny'n briodol.

Mae'r pwerau hyn yn rhoi'r pŵer i swyddogion wasgaru grwpiau neu unigolion os byddant yn ymddwyn mewn ffordd wrthgymdeithasol.