Heddiw yw Diwrnod Ymwybyddiaeth o Gam-drin Domestig LGBT+

Mae heddluoedd ledled y wlad yn dangos eu cefnogaeth heddiw (dydd Gwener, 28 Mai) ar gyfer Diwrnod Ymwybyddiaeth o Gam-drin Domestig LGBT+.

Nod y diwrnod yw codi ymwybyddiaeth o gam-drin yng nghymunedau LGBT+ ac annog dioddefwyr i gysylltu â'r heddlu.

Mae hefyd yn cyfleu neges glir iawn – Nid yw Cam-drin Domestig yn Rhywbeth i fod yn Falch Ohono.

Fe'i lansiwyd yn y DU gan Gyd-gadeirydd Rhwydwaith Heddlu LGBT+ PC Amy Tapping, ac fe'i cynhelir ochr yn ochr â diwrnodau tebyg sy'n digwydd ledled y byd.

Mae hyn yn dilyn Sefydliad Ymwybyddiaeth Trais yn y Cartref LGBTQ yn Awstralia yn sefydlu diwrnod ymwybyddiaeth agoriadol y llynedd, ac ar ôl siarad â chydweithwyr yr ochr arall i'r byd, roedd PC Tapping yn benderfynol o ddod â digwyddiad yn nes at adref.

Mae'n gobeithio y bydd y diwrnod, yn y pen draw, yn annog rhagor o ddioddefwyr camdrin domestig i gysylltu â'r heddlu a gofyn am gymorth.

Dywedodd PC Tapping: "Mae diffyg sylweddol o ran rhoi gwybod am achosion o gam-drin domestig yn y gymuned LGBT+, a'n nod yw hyrwyddo'r diwrnod ymwybyddiaeth yn ogystal ag annog rhagor o ddioddefwyr i gysylltu â'r heddlu, ond rydym am fynd y tu hwnt i hynny a pharhau i feithrin cydberthnasau gwell yn y cymunedau hyn.

"Mae llawer o ddioddefwyr yn dioddef yn dawel, ac rydym am sicrhau eu bod yn gwybod y gallwn roi cymorth a helpu i roi llais iddynt.

“Mae llawer o waith yn mynd rhagddo yn genedlaethol i ddeall anghenion y gymuned LGBT+ yn well, a gwrando ar sut y gallwn gefnogi dioddefwyr camdrin domestig ymhellach.

“Mae gan bob un ohonom ran i'w chwarae wrth ddiogelu dioddefwyr sy'n agored i niwed, a byddwn yn annog pawb i ddangos eu cefnogaeth ar gyfer y diwrnod ymwybyddiaeth hwn.

“Mae'n bwysig bod pob un ohonom yn parhau i wneud yr ymrwymiad hwn drwy'r flwyddyn, gan wneud yr hyn a allwn i gefnogi ein gilydd – gyda'n gilydd, gallwn wneud gwahaniaeth gwirioneddol.”

Mae'r Ditectif Gwnstabl Scot Anderson, Cyd-gadeirydd Cangen De Cymru Rhwydwaith Heddlu LGBT+ Cymru, yn cytuno bod angen gwneud mwy i godi ymwybyddiaeth o'r mater hwn, a bod yn rhaid i'r gwaith barhau er mwyn annog dioddefwyr LGBT+ i roi gwybod am droseddau i'r heddlu.

Dywedodd: “Rydym yn gwybod bod llawer o hanes cymhleth rhwng yr heddlu a'r cymunedau LGBT+ rydym yn eu gwasanaethau, a'n nod yw gweithio gyda'r cymunedau hynny er mwyn meithrin cydberthnasau ac ailennyn unrhyw hyder a allai fod wedi'i golli.

“Mae'r pedwar heddlu yng Nghymru wedi ymrwymo i ddiogelu dioddefwyr trosedd LGBT+ ac maent yn falch o gefnogi'r Diwrnod Ymwybyddiaeth hwn.”

I gael rhagor o wybodaeth, chwiliwch Rhwydwaith Heddlu LGBT+ Cenedlaethol ar-lein.

Rhoi gwybod am droseddau casineb

Mae troseddau casineb yn droseddau fel unrhyw drosedd arall, ond y gwahaniaeth rhyngddynt yw bod dioddefwr wedi'i dargedu o ganlyniad i'w anabledd, hil, crefydd, cyfeiriadedd rhywiol neu hunaniaeth drawsrywiol.

Gall dioddefwyr a thystion roi gwybod am ddigwyddiadau i'r heddlu heb ofn.

Ewch i: https://bit.ly/SWPReportOnline

Anfonwch neges breifat atom drwy Facebook/Twitter

Drwy e-bost: [email protected]

Ffôn: 101