Datganiad gan Heddlu De Cymru – Christopher Kapessa

Dywedodd y Prif Gwnstabl Cynorthwyol, Jenny Gilmer: 

“Roedd marwolaeth Christopher yn drasiedi, a gwyddom fod y boen a'r galar yn dal i fod. Rydym hefyd yn deall bod teulu Christopher yn anfodlon iawn ar elfennau o'r ymchwiliad cychwynnol i amgylchiadau ei farwolaeth.

“Gwnaeth ein Tîm Troseddau Mawr ymchwilio'n llawn a chasglu datganiadau gan bawb a oedd yn bresennol pan fu farw. Cyflwynwyd ffeil o dystiolaeth i Wasanaeth Erlyn y Goron.

“Mae dau fater yn mynd rhagddynt sy'n golygu na allwn gymryd rhan yn rhaglen BBC Wales Investigates ar hyn o bryd. Y materion dan sylw yw'r gŵyn yn erbyn yr heddlu a herio penderfyniad Gwasanaeth Erlyn y Goron sy'n destun Adolygiad Barnwrol.

“O ganlyniad i bryderon teulu Christopher, atgyfeiriodd Heddlu De Cymru y mater at Swyddfa Annibynnol Ymddygiad yr Heddlu sy'n parhau i archwilio'r ymateb a'r ymchwiliad cychwynnol i farwolaeth Christopher. Rydym yn croesawu ac yn gwerthfawrogi gweithgarwch craffu o'r fath.

“Yn ogystal, rydym yn ymwybodol bod y teulu'n parhau i herio penderfyniad Gwasanaeth Erlyn y Goron i beidio ag erlyn unrhyw un mewn cysylltiad â marwolaeth Christopher. Mae gan y teulu hawl i wneud hynny ac rydym yn aros am ganlyniad yr her hon. Mae'r broses gyfreithiol honno yn gwbl annibynnol ar Heddlu De Cymru.

“Mae'r ddau fater uchod yn ein hatal rhag gwneud sylwadau am fanylion penodol sy'n destun archwiliad gan Swyddfa Annibynnol Ymddygiad yr Heddlu neu achosion cyfreithiol sydd gerbron y llysoedd.

“Rydym yn aros am ganfyddiadau Swyddfa Annibynnol Ymddygiad yr Heddlu ac yn parhau i fod yn ymrwymedig i achub ar unrhyw gyfleoedd i ddysgu gwersi yn sgil ei harchwiliad. Cafodd llawer o bobl yn y gymuned leol eu hysgwyd a'u heffeithio gan farwolaeth Christopher, ac rydym yn parhau i weithio'n agos gydag asiantaethau cymorth er mwyn sicrhau bod y cymorth cywir ar gael i'r rhai sydd ei angen.”