Ymosodiad Parc Bute: Merch yn ei harddegau wedi'i chyhuddo

Heno, mae ditectifs sy'n ymchwilio i ymosodiad difrifol ym Mharc Bute, Caerdydd, wedi cyhuddo merch 16 oed o ymgais i lofruddio.

Cafodd y ferch, na ellir ei henwi am resymau cyfreithiol, ei harestio yn ardal Creigiau, Caerdydd, ddydd Llun, 26 Gorffennaf.

Mae'n cael ei chadw yn y ddalfa a bydd yn ymddangos gerbron Llys Ieuenctid Caerdydd ddydd Mercher, 28 Gorffennaf.

Mae dyn 54 oed yn dal i fod mewn cyflwr difrifol yn Ysbyty Athrofaol Cymru, Caerdydd, yn dilyn yr ymosodiad a ddigwyddodd tua 1am ddydd Mawrth, 20 Gorffennaf.

Rhoddwyd y wybodaeth ddiweddaraf i'w deulu, sy'n cael cymorth gan swyddogion cyswllt â theuluoedd sydd wedi cael hyfforddiant arbenigol.

Mae tri unigolyn wedi cael eu cyhuddo o ymgais i lofruddio erbyn hyn, ac nid yw ditectifs yn chwilio am unrhyw un arall mewn cysylltiad â'r ymosodiad ar hyn o bryd.

Dywedodd y Ditectif Brif Arolygydd Dros Dro, Stuart Wales, yr Uwch-swyddog Ymchwilio: ““Hoffwn ddiolch i'r cyhoedd am eu cymorth gwerthfawr wrth i ni barhau i ymchwilio i amgylchiadau'r digwyddiad.
“Er bod cyhuddo trydydd unigolyn yn ddatblygiad cadarnhaol iawn, rydym yn apelio am wybodaeth o hyd. Ni waeth pa mor ddibwys y mae'r wybodaeth yn ymddangos, gallai fod yn hanfodol ar gyfer ein hymchwiliad.
“Yn benodol, hoffem glywed gan unrhyw un a oedd ym Mharc Bute yn ystod oriau mân bore dydd Mawrth, 20 Gorffennaf.
“Yn benodol, rydym am siarad ag unrhyw un a oedd yn agos at bont droed y Mileniwm, sy'n cysylltu Parc Bute â Gerddi Sophia, rhwng hanner nos a 1.20am.”
Mae Ystafell Digwyddiad Mawr wedi'i sefydlu yng Ngorsaf Heddlu Canol Caerdydd a bydd mwy o batrolau'n parhau yn yr ardal.
Ymddangosodd Jason Edwards, 25 oed, a Lee William Strickland, 36 oed, y ddau ohonynt o Gaerdydd, gerbron Llys Ynadon Caerdydd ddoe (Dydd Llun, 26 Gorffennaf) wedi'u cyhuddo o ymgais i lofruddio, ac maent yn cael eu cadw yn y ddalfa ar gyfer gwrandawiad llys arall ar 23 Awst.
Gellir cyflwyno unrhyw wybodaeth neu ddeunydd fideo a allai helpu gyda'r ymchwiliad gan ddefnyddio'r porth ar-lein https://mipp.police.uk/operation/62SWP21B34-PO1

Fel arall, gallwch gysylltu â ni drwy un o'r ffyrdd canlynol, gan ddyfynnu rhif digwyddiad *254215.
Ewch i: https://bit.ly/SWPProvideInfo
Anfonwch neges breifat atom ar Facebook/Twitter
E-bostiwch: [email protected]
Ffoniwch: 101

Gallwch hefyd gyflwyno gwybodaeth i Taclo'r Tacle yn ddienw ar 0800 555 111.